Presidenti rumun, Nicuşor Dan, ka shpallur “persona non grata” konsullin rus në qytetin bregdetar të Konstancës, duke kërkuar largimin e tij nga Rumania, ndërsa autoritetet kanë paralajmëruar edhe mbylljen e konsullatës ruse në këtë qytet.
Vendimi erdhi pas një incidenti me dron rus, i cili goditi një bllok apartamentesh në Galaçi, pranë kufirit me Ukrainën, duke lënë të plagosur dy persona.
Pas mbledhjes së Këshillit Suprem të Mbrojtjes Kombëtare, Dan deklaroi se droni ishte pjesë e një “tufe” prej 43 dronësh që kishin në shënjestër objektiva në Ukrainë. Ai kritikoi gjithashtu disa politikanë rumunë që, sipas tij, po përpiqen ta minimizojnë përgjegjësinë e Rusisë për incidentin.
Presidenti rumun theksoi se reagimi i përbashkët i aleatëve të Rumanisë në NATO përfaqëson një shfaqje të fuqishme solidariteti. Ai njoftoi se aleanca do të zhvendosë përkohësisht disa pajisje të mbrojtjes ajrore në Rumani, derisa vendi të modernizojë sistemet e veta të mbrojtjes.
Sinjali – aty ku e vërteta flet para lajmit!
