Kryeministri i Kosovës, Albin Kurti, ka kujtuar referendumin e vitit 1991 për pavarësinë e Kosovës, me rastin e 35-vjetorit të mbajtjes së tij.
Kurti ka publikuar një fotografi të fletëvotimit të referendumit dhe ka shkruar se nga 26 deri më 30 shtator 1991, në Kosovë u mbajt referendumi për shpalljen e vendit shtet sovran dhe të pavarur.
Sipas shifrave të paraqitura nga Kurti, nga 1,051,357 qytetarë me të drejtë vote, në referendum morën pjesë 914,802, ndërsa 913,705 votuan për pavarësinë.
Ai e ka cilësuar referendumin si një ngjarje me rëndësi historike, duke thënë se përmes tij u shpreh vullneti politik i qytetarëve të Kosovës për vetëvendosje dhe pavarësi.
Kurti ka kujtuar edhe zhvillimet politike të viteve paraprake, përfshirë Deklaratën Kushtetuese të 2 korrikut 1990 dhe Kushtetutën e Kaçanikut të 7 shtatorit 1990.
“Referendumi i shtatorit 1991 për Republikën e Kosovës shtet sovran dhe i pavarur, përfaqëson një ngjarje me rëndësi historike”, ka shkruar Kurti, duke shtuar se kjo aspiratë politike u realizua më vonë me shpalljen e pavarësisë së Kosovës.
Referendumi i vitit 1991 u mbajt nga 26 deri më 30 shtator dhe, sipas burimeve historike, rreth 87 për qind e votuesve morën pjesë, ndërsa 99.87 për qind e votave të hedhura ishin në favor të pavarësisë.
Sinjali – aty ku e vërteta flet para lajmit!
