Gjykimi ndaj Lindsay Clancy, nënës nga Massachusetts e akuzuar për vrasjen e tre fëmijëve të saj të vegjël, ka përfunduar pa një vendim, pasi juria nuk arriti të binte dakord unanimisht për fajësinë e saj.
Gjykatësi William Sullivan e shpalli të premten procesin të pavlefshëm, pasi juria e njoftoi për herë të tretë se kishte mbetur e bllokuar. Vendimi erdhi pas një procesi që zgjati afro gjashtë javë dhe shtatë ditësh diskutime të jurisë.
Clancy ishte deklaruar e pafajshme për tri akuza për vrasje të shkallës së parë, në lidhje me vdekjen e fëmijëve të saj, Cora, 5 vjeç, Dawson, 3 vjeç, dhe Callan, 8 muajsh.
Në qendër të procesit ishte çështja nëse ajo ishte penalisht përgjegjëse për vrasjet apo nëse duhej të shpallej e pafajshme për shkak të mungesës së përgjegjësisë penale si pasojë e një çrregullimi mendor.
Mbrojtja argumentoi se Clancy vuante nga psikozë pas lindjes në kohën e ngjarjes, më 24 janar 2023, dhe se gjendja e saj mendore ishte përkeqësuar gjatë muajve paraprakë.
Avokatët e saj u mbështetën edhe në dëshminë e psikiatrit ligjor Phillip Resnick, i cili arriti në përfundimin se Clancy ishte në gjendje psikotike në momentin e vrasjeve.
Në anën tjetër, prokurorët argumentuan se ajo ishte e vetëdijshme për veprimet dhe se i kishte planifikuar vrasjet. Sipas akuzës, Clancy e kishte dërguar bashkëshortin jashtë shtëpisë për të marrë ushqim dhe për të shkuar në farmaci, duke krijuar kohë për të vepruar.
Pas dështimit të jurisë për të arritur një vendim unanim, gjykatësi e shpalli procesin të pavlefshëm.
Sinjali – aty ku e vërteta flet para lajmit!
