Në Mitrovicën e Veriut, qytetarët serbë kanë festuar me flamuj pas betimit të kryetarit të ri të komunës, Millan Radojeviq, i cili u zyrtarizua sot në seancën inauguruese të Kuvendit Komunal.
Pas ceremonisë, kryetari i ri u prit nga një numër qytetarësh dhe përfaqësues të Listës Serbe, të cilët organizuan një ecje e cila do të duhej të ishte simbolike drejt selisë së partisë, por që u shndërrua në provokuese.
Gjatë tubimit, mbështetësit valëvitën flamuj serbë dhe brohoritën “Fitore” dhe “Serbia”, ndërsa Radojeviq u adresoi qytetarëve mesazhe të përmbajtura optimizmi, raporton Telegrafi.
Ai u bëri thirrje banorëve për durim dhe besim, duke theksuar se “ndryshimet pozitive kërkojnë kohë”.
Me këtë mandat, Radojeviq merr drejtimin e komunës pas Erden Atiq, i cili udhëhoqi Mitrovicën e Veriut gjatë mandatit të kaluar nga radhët e Lëvizjes Vetëvendosje.
Betimi i tij shënon nisjen e një kapitulli të ri politik në komunën me ndarje të theksuar etnike dhe dinamika të ndjeshme politike.
Ceremonia dhe festimet që pasuan nxorën në pah mobilizimin e elektoratit serb në veri, ndërsa pritet që ditët në vijim kryetari i ri të paraqesë prioritetet dhe planet e tij për qeverisjen lokale. /Telegrafi/
