Ukraina po intensifikon përdorimin e dronëve të pajisur me inteligjencë artificiale për të goditur objektiva ushtarake ruse në thellësi të territorit të kontrolluar nga Moska, një zhvillim që ekspertët e cilësojnë si transformues për luftën moderne.
Sipas raportimeve të BBC, sulmet e fundit janë përqendruar në linjat logjistike dhe automjetet e furnizimit që lidhin Rusinë me territoret e pushtuara në jug të Ukrainës, përfshirë edhe rajonin e Krimesë.
Dronët e rinj, të njohur si “Hornet”, thuhet se janë të aftë të identifikojnë dhe ndjekin objektivat në mënyrë autonome pas aktivizimit dhe drejtimit fillestar nga operatorët.
Eksperti i armëve Nick Brown thekson se sistemet e inteligjencës artificiale janë trajnuar me mijëra orë materiale vizuale të pajisjeve ushtarake ruse, duke u mundësuar dronëve të dallojnë dhe godasin objektivat me saktësi të lartë.
Sipas analistëve ushtarakë, kjo teknologji po rrit ndjeshëm efektivitetin e sulmeve ukrainase dhe po e bën më të vështirë neutralizimin e dronëve nga sistemet ruse të luftës elektronike.
Ekspertët vlerësojnë gjithashtu se përdorimi i këtyre dronëve po e detyron Rusinë të zhvendosë më larg vijës së frontit infrastrukturën e saj logjistike dhe mbështetëse, duke ndryshuar balancën taktike në terren.
Sinjali – aty ku e vërteta flet para lajmit!
