E ardhmja e Karim Adeyemi te Borussia Dortmund mbetet e pasigurt, pavarësisht ofertës së vazhdimit të kontratës që i është bërë prej disa kohësh.
Sulmuesi gjerman nuk ishte i thirrur për ndeshjet e fundit të ekipit kombëtar, ndërsa te Dortmund ai ka humbur rol kryesor në gjysmën e dytë të sezonit, duke luajtur shpesh nga stoli.
Këto zhvillime e bëjnë gjithnjë e më të pamundur rinovimin e kontratës së tij, e cila aktualisht skadon në vitin 2027. Sipas raportimeve nga Sport Bild, vetë lojtari është i interesuar për një transferim në Ligën Premier.
Klubet angleze pritet të jenë në gjendje të përballojnë një transferim të tillë, ndërsa edhe çmimi i kartonit të Adeyemit duket se ka pësuar rënie. Nga 60 milionë euro që përflitej më parë, tani Borussia Dortmund kërkon rreth 50 milionë euro për kartonin e tij.
Interes për sulmuesin kanë shprehur disa klube të mëdha europiane, përfshirë Juventusin, Romen, si dhe gjigantët anglezë Chelsea, Manchester United dhe Arsenal.
Mbetet për t’u parë nëse ndonjë nga këto skuadra do të jetë e gatshme të paguajë shumën e kërkuar për të siguruar shërbimet e tij gjatë afatit kalimtar veror.
Sinjali – aty ku e vërteta flet para lajmit!
