Ministria e Administrimit të Pushtetit Lokal ka reaguar lidhur me zhvillimet e sotme në Kuvendin e Asociacionit të Komunave të Kosovës.
Në reagim, MAPL ka theksuar se mbledhja e sotme ngre shqetësime serioze lidhur me legalitetin dhe legjitimitetin e organeve të zgjedhura të Asociacionit.
“Edhe pse Ligji për Vetëqeverisje Lokale, përkatësisht nenet 31 dhe 32, përcaktojnë qartë të drejtën e komunave për t’u organizuar dhe bashkëpunuar në kuadër të asociacioneve për mbrojtjen e interesave të përbashkëta, ky organizim duhet të jetë mbipartiak dhe në shërbim të të gjitha komunave në mënyrë të barabartë”.
Sipas kësaj ministrie, procesi i sotëm në fakt shkel mbi këto parime dhe rregulla.
“Ai, fatkeqësisht, u karakterizua nga një sërë shkeljesh procedurale dhe devijimesh nga normat që rregullojnë funksionimin e Asociacionit. Për më tepër vu re një shmangie e qartë nga respektimi i procedurave të përcaktuara me Statutin dhe Rregulloren e Punës, duke cenuar kështu legjitimitetin dhe integritetin e vendimmarrjes”.
“Me theks të veçantë shqetësues është fakti për përpjekjet e hapura për t’i dhënë Asociacionit një ngjyrim politik partiak, në kundërshtim me frymën e ligjit që e përcakton dhe sanskionon qartë natyrën e këtij institucioni.
Madje, ekzistojnë indikacione serioze për përpjekje të organizuara të përjashtimit të kryetarëve të komunave të udhëhequra nga një subjekt i caktuar politik, çka përbën cenim të parimit të përfaqësimit të barabartë dhe gjithëpërfshirës”.
Ministria e Administrimit të Pushtetit Lokal thekson se do t’i shqyrtojë me seriozitet të plotë zhvillimet e sotme, legjimitetin e vendimeve si dhe tutje të vlerësojë raportin e bashkëpunimit me Asociacionin, transmeton Klankosova.tv.
“Çdo bashkëpunim duhet të bazohet në parime të qarta të ligjshmërisë, gjithëpërfshirjes dhe paanshmërisë politike”, thuhet më tej në reagim, transmeton Klankosova.tv.
Shumë mospajtime për kryesinë e re të Asociacionit të Komunave (VIDEO)
