Ushtria izraelite ka njoftuar se ka shkatërruar një kompleks të madh nëntokësor të operuar nga Hezbollahu në jug të Libanit, në një operacion ku janë përdorur më shumë se 1,000 tonë eksplozivë.
Sipas Forcave të Mbrojtjes së Izraelit (IDF), kompleksi përfshinte dy tunele me gjatësi totale mbi dy kilometra, të ndërtuara nën kreshtën Ali Taher.
IDF ka bërë të ditur se për shkatërrimin e tuneleve janë përdorur mbi 1,000 tonë eksplozivë. Shpërthimi ishte aq i fuqishëm sa shkaktoi aktivitet sizmik të barabartë me një tërmet me magnitudë 4.1, sipas Shërbimit Gjeologjik të Shteteve të Bashkuara (USGS).
Forcat izraelite morën kontrollin e kreshtës Ali Taher javën e kaluar, pas disa muajsh luftime me Hezbollahun, grupin e mbështetur nga Irani.
Ushtria izraelite aktualisht kontrollon një pjesë të madhe të jugut të Libanit, zonë e pushtuar pas rifillimit të konfliktit me Hezbollahun në mars.
Ndërkohë, Hezbollahu dhe qeveria libaneze nuk kanë reaguar menjëherë publikisht ndaj deklaratave të ushtrisë izraelite.
Fuqia e shpërthimit është përshkruar edhe nga banorët lokalë. Ahamed, banor i Nabatiehut, rreth gjashtë kilometra në perëndim të kreshtës, ka treguar momentin kur shpërtheu kompleksi.
“Qielli u ndriçua dhe rreth 15 sekonda më vonë dëgjuam një zhurmë tmerruese. Shtëpia u dridh e tëra, sikur të ishte fjalë për fjalë një tërmet”, ka thënë Ahamed, banor i Nabatiehut, rreth gjashtë kilometra në perëndim të kreshtës.
Sinjali – aty ku e vërteta flet para lajmit!
