Presidenti i Shteteve të Bashkuara të Amerikës, Donald Trump, ka deklaruar se administrata e tij mund të marrë deri të dielën një vendim për mundësinë e rifillimit të veprimeve ushtarake kundër Iranit.
Në një intervistë për Axios, Trump tha se do të takohet me këshilltarët e tij kryesorë për të shqyrtuar propozimin më të fundit të Teheranit, duke e vlerësuar mundësinë e një marrëveshjeje si “50/50”.
Ai theksoi se rezultati mund të çojë ose në një marrëveshje diplomatike, ose në një vendim për “shkatërrimin e plotë të Iranit”, duke rritur tensionet në raportet mes dy vendeve.
Në takimin e planifikuar për të shqyrtuar përgjigjen iraniane, pritet të marrin pjesë zyrtarë të lartë amerikanë, përfshirë të dërguarin special Steve Witkoff, këshilltarin Jared Kushner dhe zëvendëspresidentin JD Vance.
Ndërkohë, sipas burimeve diplomatike, ndërmjetësime nga Katari dhe Pakistani kanë sjellë sinjale për një afrim të mundshëm drejt një marrëveshjeje kornizë për uljen e tensioneve.
Sekretari amerikan i Shtetit Marco Rubio deklaroi se situata mbetet e pasigurt dhe se zhvillime të reja mund të ndodhin në çdo moment.
Sinjali – aty ku e vërteta flet para lajmit!
