Presidenti i Shteteve të Bashkuara, Donald Trump, ka deklaruar se SHBA-të mund të rifillojnë veprimet ushtarake ndaj Iranit nëse Teherani “sillet keq”, duke rritur tensionet në një periudhë të ndjeshme diplomatike mes dy vendeve.
Duke folur për gazetarët para nisjes së një udhëtimi në Florida, Trump tha se i ishte prezantuar një koncept për një marrëveshje me Iranin, por se po priste detajet përfundimtare të formulimit. Ai theksoi se nuk ishte i bindur për pranueshmërinë e propozimeve të fundit.
“Nëse ata sillen keq, nëse bëjnë diçka të gabuar, gjithçka është e mundur”, u shpreh ai, duke lënë të hapur mundësinë e veprimeve të reja ushtarake.
Deklaratat vijnë në një kohë kur diplomacia mes SHBA-së dhe Iranit është intensifikuar, me propozime që lidhen me hapjen e rrugëve detare në Ngushticën e Hormuzit dhe lehtësimin e disa sanksioneve ekonomike.
Nga ana tjetër, një zyrtar iranian bëri të ditur se Teherani ka paraqitur një propozim që përfshin rihapjen e ngushticës strategjike dhe rikthimin e qasjes ndaj negociatave për programin bërthamor, por vetëm nëse ndryshon qasja e Uashingtonit.
Raportimet ndërkombëtare tregojnë se tensionet mbeten të larta, ndërsa bisedimet po zhvillohen përmes ndërmjetësve dhe ende nuk është arritur një marrëveshje konkrete.
Situata ka ndikim edhe në tregjet globale të energjisë, pasi Ngushtica e Hormuzit konsiderohet një nga pikat më të rëndësishme për furnizimin botëror me naftë dhe gaz.
Sinjali – aty ku e vërteta flet para lajmit!
