Një 32-vjeçar nga Kosova ka përfunduar në burg në Gjermani pasi tentoi t’i shmangej një kontrolli kufitar të Policisë Federale në Weil am Rhein.
Ngjarja ndodhi pasditen e së mërkurës, më 17 qershor 2026, kur i dyshuari po udhëtonte si pasagjer në një veturë me targa franceze që po hynte në Gjermani përmes Urës Palmrain, transmeton Albinfo.ch.
Sipas raportimeve, ai zbriti nga automjeti pranë pikës kufitare dhe u largua me vrap në drejtim të një argjinature. Zyrtarët e Policisë Federale e ndoqën dhe e arrestuan pas një ndjekjeje të shkurtër.
Kontrolli i identitetit të tij zbuloi arsyen e tentativës për arratisje. Një gjykatë gjermane e kishte dënuar vitin e kaluar me një gjobë prej 3.579 eurosh për veprën penale të vjedhjes së rëndë, por ai nuk e kishte paguar atë. Gjithashtu, nuk e kishte vuajtur as dënimin alternativ me burg, çka bëri që autoritetet gjyqësore të lëshonin urdhër arresti ndaj tij në janar të vitit 2026.
Meqenëse nuk ishte në gjendje të shlyente detyrimet financiare ndaj gjykatës, 32-vjeçari u arrestua dhe u dërgua në institucionin korrektues më të afërt, ku tashmë po vuan dënimin e tij.
Sinjali – aty ku e vërteta flet para lajmit!
