Ushtria amerikane ka njoftuar të martën se ka sekuestruar një tanker të lidhur me Iranin në ujërat ndërkombëtare, në një veprim që shihet si pjesë e zbatimit të një bllokade, teksa koha për armëpushim po shkurtohet dhe perspektiva për bisedime të mëtejshme mbetet e paqartë.
Uashingtoni ka shprehur besim se bisedimet me Iranin do të vazhdojnë në Pakistan, ndërsa një zyrtar i lartë iranian ka thënë se Teherani po shqyrton mundësinë e bashkimit në to. Megjithatë, me afrimin e fundit të armëpushimit dyjavor, mbetet pak kohë për zhvillime konkrete.
Ushtria amerikane ka bërë të ditur se ka kapur tankerin “Tifani” “pa incidente”. Anija, e cila ka kapacitet për të transportuar 2 milionë fuçi naftë të papërpunuar, ka raportuar për herë të fundit pozicionin e saj të martën në mëngjes pranë Sri Lankës në Oqeanin Indian, sipas të dhënave të MarineTraffic. Ajo ka qenë afër ngarkesës së plotë dhe kishte sinjalizuar Singaporin si destinacion.
“Siç e kemi bërë të qartë, ne do të ndjekim përpjekjet globale të zbatimit të ligjit detar për të ndërprerë rrjetet e paligjshme dhe për të ndaluar anijet e sanksionuara që ofrojnë mbështetje materiale për Iranin, kudo që ato veprojnë”, tha Komanda Qendrore e SHBA-së.
Në një deklaratë të shkurtër në rrjetet sociale, Trump tha se Irani kishte kryer shkelje të shumta të armëpushimit, pa dhënë detaje të mëtejshme.
Nga ana tjetër, nuk ka pasur reagim të menjëhershëm nga Irani për sekuestrimin e anijes. Megjithatë, ky veprim mund të ndërlikojë përpjekjet për organizimin e bisedimeve të paqes, pasi Irani ka deklaruar më herët se bllokada e porteve të tij përbën shkelje të armëpushimit nga SHBA-ja dhe se nuk do të negociojë ndërsa bllokada është në fuqi.
Sinjali – aty ku e vërteta flet para lajmit!
