Fjalët përfundimtare për sulmin terrorist në Banjskë, janë dhënë sot në Gjykatën Themelore në Prishtinë.
Prokurori i Prokurorisë Speciale, Naim Abazi, ka kërkuar burgim të përjetshëm ndaj tre të akuzuarve, Blagoje Spasojeviq, Vladimir Toliq dhe Dushan Maksimoviq.
Gazetarja Qëndresa Tërshani e ftuar në emisionin “Kosova Today” në KlanKosova tha se sot në seancën përfundimtare, prokurori dhe avokatët kishin mundësinë e fundit për fjalët përfundimtare para vendimit të trupit gjykues mbi të akuzuarit.
“Sot e patën mundësinë e fundit prokurori dhe avokatët që të japin fjalën e fundit, para se të vendoset përfundimisht mbi dënimin për treshen e arrestuar tashmë, të vetmit nga 45 persona sa janë të akuzuar për sulmin terrorist të ndodhur në Banjskë. Përveç provave ka qenë edhe pjesa që prokurori i jep theks cënimit të Republikës së Kosovës dhe dëmi që këta persona kanë pasur t’i shkaktojnë shtetit të Kosovës”, tha Tërshani.
