Rusia ka kryer sulme në disa zona të Ukrainës, ku raportohet për viktima dhe të plagosur.
Në Balakliia të rajonit të Harkivit, dy persona kanë mbetur të vrarë nga një sulm rus, sipas kreut të administratës ushtarake të qytetit, Vitalii Karabanov.
“Fatkeqësisht, pasojat e këtij sulmi janë të tmerrshme. Raportet e para tregojnë se dy persona janë vrarë”, ka shkruar Karabanov në Telegram.
Ndërkohë, në Kiev janë lëshuar raketa balistike. Kryetari i qytetit, Vitali Klitschko, ka njoftuar se sistemet e mbrojtjes ajrore ishin aktivizuar dhe u ka bërë thirrje banorëve të qëndrojnë në strehimore.
Sulme të përsëritura janë raportuar edhe në Odesa. Sulmi i dytë ndodhi gjatë një operacioni të shpëtimit. Sipas mediave lokale, rreth 10 persona janë plagosur.
Ndërkohë, në Rusi, një dron ka goditur një kullë ftohëse të centralit bërthamor të Kurskut, shkruan Euronews.com, transmeton Sinjali.
Agjencia Ndërkombëtare e Energjisë Atomike (IAEA) ka konfirmuar se ishte në dijeni për sulmin, por tha se centrali vazhdonte të funksiononte. Sipas saj, nuk kishte pasur zjarr dhe operimet kishin vazhduar.
Drejtori i Përgjithshëm i IAEA-së, Rafael Grossi, ka paralajmëruar kundër sulmeve të tjera pranë infrastrukturës bërthamore dhe ka bërë thirrje për “përmbajtje maksimale ushtarake”, për të shmangur rrezikun e një aksidenti bërthamor.
Sinjali – aty ku e vërteta flet para lajmit!
