Rusia ka sulmuar Ukrainën me raketa balistike dhe dronë, duke vrarë të paktën 14 persona dhe duke lënë të plagosur të paktën 22 të tjerë, në një nga sulmet më vdekjeprurëse ndaj Kievit gjatë këtij viti.
Gjatë sulmit, i cili nisi pas mesnatës së së mërkurës, kreu i administratës ushtarake të Kievit, Timur Tkachenko, tha se “armiku po sulmon sërish në mënyrë masive rajonin e Kievit”.
Alarmet për sulme ajrore qëndruan aktive për më shumë se një orë, ndërsa valë raketash balistike goditën qytetin dhe zonat përreth. Administrata ushtarake e Kievit bëri të ditur se bombardimet dëmtuan ndërtesa banimi dhe depo, raporton BBC – transmeton Sinjali.
Sipas Tkachenkos, nëntë persona u vranë në distriktin Boryspil, katër në distriktin Bucha dhe një në distriktin Fastiv.
Ministria ruse e Mbrojtjes njoftoi se kishte goditur qendra logjistike dhe furnizimi në Kiev dhe rajonin përreth.
“Këto qendra përdoreshin për ruajtjen dhe shpërndarjen e armëve dhe furnizimeve të ndryshme ushtarake, si dhe për prodhimin dhe shpërndarjen e mjeteve ajrore pa pilot”, thuhet në deklaratë.
Ministria shtoi gjithashtu se kishte goditur tre anije mallrash pranë portit të Odesës në Detin e Zi, të cilat, sipas saj, “transportonin armë dhe pajisje ushtarake”.
Kryetari i Kievit, Vitali Klitschko, tha se ekziston frika se disa persona mund të jenë bllokuar nën rrënoja pas sulmeve në qendër të qytetit. Ai bëri të ditur në Telegram se katër nga të plagosurit ndodhen në gjendje të rëndë.
“Armiku po godet sërish qëllimisht civilët dhe infrastrukturën civile”, deklaroi administrata ushtarake e Kievit.
Rusia ka intensifikuar sulmet ndaj Kievit javët e fundit, ndërsa edhe Ukraina ka shtuar sulmet ndaj infrastrukturës civile ruse, përfshirë objektet energjetike.
Sinjali – aty ku e vërteta flet para lajmit!
