Paris Saint-Germain raportohet se po përgatit një ofertë të madhe për sulmuesin e Atlético Madridit, Julián Álvarez, gjatë afatit kalimtar të janarit.
Sipas mediumit spanjoll El Nacional, transferimi i argjentinasit është kërkuar nga trajneri Luis Enrique, ndërsa presidenti i PSG-së, Nasser Al-Khelaïfi, e ka miratuar operacionin.
Klubi francez thuhet se është i gatshëm të bëjë një investim të madh për ta bindur Atléticon të heqë dorë nga një prej futbollistëve kryesorë të skuadrës.
Álvarez ishte lidhur gjatë verës me një kalim te Barcelona, por marrëveshja nuk u realizua dhe ai mbeti në Madrid. Klubi katalanas vazhdon të interesohet për sulmuesin, por PSG-ja synon të veprojë më shpejt dhe ta fitojë garën në janar.
Transferimi pritet të jetë i vështirë, pasi Atlético ka treguar se nuk dëshiron të negociojë lehtë për argjentinasin dhe më herët është raportuar se klubi madrilen kërkon një shumë jashtëzakonisht të lartë për kartonin e tij.
Luis Enrique e konsideron Álvarezin profil të përshtatshëm për repartin ofensiv të PSG-së. Trajneri spanjoll së fundmi e vazhdoi kontratën me kampionët francezë deri në vitin 2030.
Deri tani nuk raportohet për bisedime zyrtare ndërmjet dy klubeve dhe gjithçka mbetet në kuadër të interesimit të PSG-së.
Sinjali – aty ku e vërteta flet para lajmit!
