Luftimet mes Ukrainës dhe Rusisë janë intensifikuar me një valë të re sulmesh në të dyja anët, duke shkaktuar viktima, të plagosur dhe zjarre në objekte industriale e energjetike.
Forcat e armatosura ukrainase kanë njoftuar se kanë goditur një rafineri nafte në Orsk të Rusisë, rreth 1 mijë e 500 kilometra larg vijës së frontit.
Sipas autoriteteve ukrainase, sulmi me raketa me rreze të gjatë kishte në shënjestër një prej rafinerive më të mëdha në rajonin e Orenburgut, ndërsa pas goditjes është raportuar zjarr në zonë.
Presidenti ukrainas, Volodymyr Zelensky, ka deklaruar se sulmet ndaj infrastrukturës energjetike ruse synojnë të kufizojnë të ardhurat nga nafta, të cilat, sipas Kievit, Moska i përdor për financimin e luftës.
Ukraina ka ndërmarrë edhe një sulm tjetër me dronë në territorin rus, duke shkaktuar zjarr në një fabrikë të kompanisë Wildberries në Voronezh.
Këto sulme vijnë një ditë pasi në Nizhnekamsk u vranë të paktën 13 persona dhe rreth 40 të tjerë u plagosën, në një prej bilanceve më të rënda civile të raportuara së fundmi në territorin rus.
Ndërkohë, Rusia ka goditur Ukrainën me një valë të re bombardimesh, duke shkaktuar të paktën nëntë viktima dhe dhjetëra të plagosur.
Tre persona janë vrarë në Zaporizhzhia pas sulmeve me raketa dhe bomba të drejtuara nga ajri. Në Kiev janë raportuar shpërthime të fuqishme, ndërsa autoritetet thanë se një fabrikë u përfshi nga zjarri dhe një person u plagos.
Në rajonin e Dnipropetrovskut, tre persona të tjerë janë vrarë dhe pesë janë plagosur nga sulmet me dronë dhe artileri.
Zelensky ka deklaruar gjithashtu se Rusia ka përdorur raketa balistike të Koresë së Veriut në sulmet vdekjeprurëse ndaj Zaporizhzhias.
Sinjali – aty ku e vërteta flet para lajmit!
