Partia Demokratike e Kosovës ka përshëndetur miratimin nga Kuvendi të deklaratës lidhur me aktgjykimin e Dhomave të Specializuara në Hagë ndaj Hashim Thaçit, Kadri Veselit, Jakup Krasniqit dhe Rexhep Selimit.
Në një reagim pas votimit, PDK-ja ka falënderuar grupet parlamentare për mbështetjen dhe kontributin në harmonizimin e tekstit të deklaratës së propozuar nga grupi i saj parlamentar.
Sipas PDK-së, me miratimin e deklaratës, Kuvendi ka shprehur qëndrimin e tij lidhur me mbrojtjen e së vërtetës së luftës çlirimtare dhe kundërshtimin e aktgjykimit, të cilin partia e cilëson si të padrejtë.
PDK-ja ka kërkuar që tash të procedohet Projektligji për ndryshimin dhe plotësimin e Ligjit për Dhomat e Specializuara, i propozuar nga kjo parti.
“Radha është e Projektligjit për ndryshimin dhe plotësimin e Ligjit për Dhomat e Specializuara, të propozuar nga PDK-ja. Kërkojmë nga Qeveria që ta procedojë pa vonesë në Kuvend dhe nga të gjitha grupet parlamentare që ta trajtojnë e votojnë me urgjencë”, thuhet në reagim.
Partia ka vlerësuar se miratimi i deklaratës përbën një hap politik, ndërsa votimi i projektligjit, sipas saj, do të ishte hapi i radhës për t’i dhënë përgjigje institucionale çështjeve të ngritura.
PDK-ja ka thënë se do të vazhdojë angazhimin për mbrojtjen e luftës së UÇK-së dhe për një proces të drejtë ndaj ish-krerëve të saj.
Sinjali – aty ku e vërteta flet para lajmit!
