Një turmë e zemëruar i vuri flakën një pjese të spitalit në epiqendrën e shpërthimit të Ebola-s në lindje të Republikës Demokratike të Kongos, pasi familjarët dhe miqtë e një të riu, që dyshohej se kishte vdekur nga virusi, u penguan ta merrnin trupin e tij për varrim.
“Ata filluan të hidhnin mjete të forta drejt spitalit. Madje u vunë flakën tendave që përdoreshin si reparte izolimi”, i tha BBC-së politikani lokal Luc Malembe Malembe, duke përshkruar skenën që kishte parë në Spitalin e Përgjithshëm Rwampara.
Në kaosin e krijuar, policia qëlloi në ajër për të shpërndarë turmën.
Trupi i një viktime të Ebola-s është shumë infektiv dhe autoritetet duhet të sigurojnë varrim të sigurt për të parandaluar përhapjen e virusit.
Punonjësit shëndetësorë në spitalin Rwampara, që ndodhet pranë qytetit Bunia në provincën Ituri – ku janë raportuar pothuajse të gjitha rastet – u vendosën nën mbrojtje ushtarake, ndërsa policia ndërhyri për të rikthyer rendin.
Një punonjës shëndetësor u plagos nga protestuesit që hidhnin gurë, para se të ndërhynin forcat e rendit, tha një punëtor i spitalit për agjencinë AFP.
I riu që humbi jetën ishte figurë e njohur në komunitetin lokal dhe njerëzit e zemëruar nga vdekja e tij nuk “e kuptonin realitetin e sëmundjes”, tha Jean Claude Mukendi, koordinator i reagimit të sigurisë ndaj Ebola-s në Ituri, për Associated Press.
Dëshmitarët i thanë Reuters se i riu ishte futbollist dhe kishte luajtur për disa skuadra lokale. Nëna e tij deklaroi për agjencinë se besonte që djali kishte vdekur nga tifoja dhe jo nga Ebola.
Malembe tha se turma nuk besonte se virusi, i cili deri më tani ka vrarë më shumë se 130 persona në lindje të Kongos, ishte real.
“Njerëzit nuk janë informuar ose vetëdijesuar siç duhet për atë që po ndodh. Për një pjesë të caktuar të popullsisë, veçanërisht në zonat e thella, Ebola është një shpikje e të huajve – nuk ekziston”, tha politikani.
“Ata besojnë se OJQ-të dhe spitalet po e krijojnë këtë për të fituar para dhe kjo është tragjike.”
Ai tha se dy tenda ishin djegur, bashkë me një trup që duhej të varrosej.
Organizata Botërore e Shëndetësisë rekomandon “varrime të sigurta dhe dinjitoze” për viktimat e Ebola-s, me ekipe të trajnuara që përdorin pajisje mbrojtëse për trajtimin e trupave.
Gjashtë pacientë po trajtoheshin në tendat brenda kompleksit të spitalit dhe fillimisht u raportua se mund të kishin ikur gjatë kaosit.
Megjithatë, sipas organizatës mjekësore Alima, e cila raportohet se menaxhonte tendat, të gjithë pacientët janë lokalizuar dhe “aktualisht po marrin trajtim në spital”.
Sinjali – aty ku e vërteta flet para lajmit!
