Trajneri i Bournemouth, Andoni Iraola, ka deklaruar se pret një lloj njohjeje nga miku i tij, Mikel Arteta, pasi skuadra e tij e ‘bëri’ Arsenalin kampion me barazimin 1-1 kundër Manchester Cityt të martën në mbrëmje.
Trajneri u pyet nëse priste një shishe shampanjë apo verë. “Do të ishte mirë të merrja diçka, nuk e di. As telefonin tim nuk e kam parë ende, por të paktën një mesazh”, tha ai, shkruan Abola, raporton KlanKosova.tv.
“Por, sidoqoftë, kjo nuk lidhet vetëm me këtë ndeshje; ndoshta do të kishin fituar edhe pa të. Jam i lumtur për të sepse bëri një punë të jashtëzakonshme. Në sezonet e fundit, ata kanë qenë shumë të qëndrueshëm”, tha Iraola për mikun e tij.
Të dy ndanë një dhomë zhveshjeje te skuadra baske Antiguoko, por pas viteve të tyre formuese, karrierat e tyre si lojtarë morën rrugë të ndryshme. Mikel Arteta u largua nga Antiguoko për t’u bashkuar me akademinë e famshme të Barcelonës, La Masia, duke u nisur më vonë një udhëtim që e çoi kryesisht në Mbretërinë e Bashkuar; Iraola qëndroi në Spanjë për pjesën më të madhe të
karrierës së tij, duke u bërë një legjendë te Athletic Bilbao.
