José Mourinho pritet të përballet me një nga vendimet e para të rëndësishme që nga rikthimi i tij në stolin e Real Madridit.
“Los Blancos” të dielën përballen me Atlético Madridin në derbin e kryeqytetit, ndërsa vëmendja para ndeshjes është përqendruar te zgjedhjet e Mourinhos, veçanërisht në repartin ofensiv.
Yan Diomande ka fituar terren në javët e fundit dhe kjo ka hapur mundësinë që Mourinho t’i japë atij një vend në formacionin startues në vend të Vinícius Júniorit.
Në emisionin “El Larguero” të “Cadena SER” është diskutuar mundësia që braziliani të nisë ndeshjen nga banka rezervë, pas paraqitjeve të tij të fundit nën nivelin e pritur.
Gazetari Javier Herraiz ka thënë se Viniciusit i nevojitet një paraqitje e mirë, duke theksuar se braziliani aktualisht nuk është në nivelin që pritet prej tij.
“Duhet të bëjë një ndeshje të mirë. Është yll i skuadrës, por është në një nivel më të ulët nga ai që pritet prej tij dhe tani është Diomande, i cili po i bën presion”, ka deklaruar Herraiz.
Ndërkohë, moderatori Manu Carreño ka thënë se Mourinho është rikthyer te Real Madridi pikërisht për të marrë vendime të vështira dhe për të mos i trajtuar lojtarët si të paprekshëm.
Sipas tij, tifozët e Real Madridit presin që trajneri portugez ta lërë në stol Viniciusin nëse ai nuk është në formën e duhur, pavarësisht emrit të tij.
“Nëse Viniciusi nuk po luan mirë, ai duhet të ulet në stol. Mourinho erdhi pikërisht për të marrë vendime të këtij lloji”, ka thënë Carreño.
Derbi ndaj Atlético Madridit pritet të jetë testi i parë i rëndësishëm për Mourinhon në menaxhimin e situatave të tilla, ndërsa vendimi për Viniciusin mbetet një nga dilemat kryesore para përballjes.
Sinjali – aty ku e vërteta flet para lajmit!
