Të paktën 22 ushtarakë amerikanë mund të kenë humbur jetën që nga nisja e luftës me Iranin, katër më shumë se shifra zyrtare e publikuar nga Pentagoni.
Raportimi është bërë nga “Washington Post”, i cili citon pesë zyrtarë amerikanë të njohur me të dhënat e brendshme të Departamentit të Mbrojtjes. Një zyrtar i gjashtë ka thënë se numri mund të jetë 23 të vdekur që nga 28 shkurti, kur nisi konflikti.
Sipas gazetës amerikane, jo të gjitha vdekjet shtesë lidhen drejtpërdrejt me luftimet, por kanë ndodhur mes personelit amerikan të dislokuar në Lindjen e Mesme gjatë periudhës së armiqësive.
Sekretari amerikan i Mbrojtjes, Pete Hegseth, e ka mohuar raportimin, duke e cilësuar në një reagim në rrjetin social X si “një gënjeshtër të plotë”.
Ndërkohë, sistemi zyrtar i Pentagonit për viktimat, Defense Casualty Analysis System (DCAS), liston aktualisht 18 ushtarakë amerikanë të vrarë që nga fillimi i konfliktit.
“Washington Post” raporton se 14 prej tyre figurojnë në kategorinë e operacionit “Epic Fury”, emërtimi i përdorur nga administrata amerikane për luftën me Iranin, ndërsa katër të tjerë janë regjistruar në një kategori të veçantë për operacionet jashtë vendit.
Sipas gazetës, klasifikimi i viktimave amerikane ka shkaktuar debat edhe më herët. Katër ushtarakë të vrarë gjatë përshkallëzimit të luftimeve në korrik u hoqën përkohësisht nga kategoria kryesore e viktimave të luftës dhe u regjistruan në një kategori tjetër.
Të dhënat publike të Pentagonit tregojnë gjithashtu se më shumë se 820 ushtarakë amerikanë janë plagosur që nga fillimi i konfliktit. Një pjesë e tyre kanë pësuar dëmtime traumatike në tru si pasojë e sulmeve iraniane ndaj bazave amerikane në Lindjen e Mesme.
Pentagoni, sipas “Washington Post”, nuk iu përgjigj pyetjeve të gazetës lidhur me mospërputhjen mes të dhënave të brendshme dhe shifrës zyrtare të publikuar.
Për momentin, 18 mbetet numri zyrtar i viktimave të publikuar nga Pentagoni, ndërsa shifrat 22 dhe 23 bazohen në burime të paidentifikuara të cituara nga “Washington Post” dhe janë kundërshtuar publikisht nga Hegseth.
Sinjali – aty ku e vërteta flet para lajmit!
