Ministria e Industrisë, Ndërmarrësisë, Tregtisë dhe Inovacionit (MINTI) ka kërkuar nga operatorët ekonomikë që merren me produkte të qumështit që, bazuar në ligj, të paraqesin qartë specifikat e produkteve në treg.
Sipas MINTI-t, deklaracioni i produktit në gjuhën zyrtare, i vendosur në paketim, duhet të jetë i qartë dhe i lexueshëm, duke përfshirë specifikat si: me bazë shtazore (100%), me bazë bimore dhe me bazë të qumështit pluhur.
Po ashtu, u është kërkuar subjekteve që merren me shitje me pakicë që të sigurojnë ndarjen dhe prezantimin e qartë të produkteve në rafte, sipas kategorive përkatëse.
“Ministria e Industrisë, Ndërmarrësisë, Tregtisë dhe Inovacionit, përmes Inspektoratit Qendror të Mbikëqyrjes së Tregut, do të intensifikojë aktivitetet e inspektimit në ditët në vijim, në përputhje me kompetencat ligjore për mbikëqyrjen e tregut, me qëllim të mbrojtjes së konsumatorëve dhe parandalimit të praktikave mashtruese. Në rast të moszbatimit të legjislacionit në fuqi për ndarjen fizike dhe etiketimin e produkteve, operatorët ekonomikë do të ndëshkohen sipas dispozitave të ligjit në fuqi”, ka njoftuar MINTI.
Sinjali – aty ku e vërteta flet para lajmit!
