Ministri i Jashtëm gjerman, Johann Wadephul, i ka bërë thirrje Komisionit Evropian që mbrojtjen e kufijve të jashtëm të Bashkimit Evropian ta vendosë si një “prioritet absolut”, pas mbërritjes së dhjetëra mijëra migrantëve në enklavën spanjolle të Ceutës nga Maroku.
Në një deklaratë për gazetën gjermane “Bild”, Wadephul tha se zhvillimet e ditëve të fundit në Ceuta përbënin një sfidë të jashtëzakonshme, e cila, sipas tij, u menaxhua me sukses, por njëkohësisht nxori në pah dobësitë e Evropës.
“Pres që Komisioni Evropian ta bëjë mbrojtjen e kufijve të jashtëm një prioritet absolut, në mënyrë që të mos rrezikohet më tej sistemi Shengen, i cili garanton lëvizjen e lirë brenda BE-së”, deklaroi ai.
Wadephul theksoi se një politikë efektive e migracionit varet edhe nga bashkëpunimi me vendet jashtë Evropës.
“Për të kontrolluar migracionin e paligjshëm, na duhen partnerë jashtë Evropës, si në këtë rast Maroku”, tha ministri gjerman, duke vlerësuar bashkëpunimin mes Spanjës dhe Marokut për menaxhimin e situatës.
Sipas të dhënave të raportuara, rreth 50 mijë deri në 60 mijë persona kanë mbërritur në Ceuta nga Maroku brenda një kohe të shkurtër, ndërsa të paktën 67 persona raportohet se kanë humbur jetën gjatë përpjekjes për ta kaluar kufirin.
Sinjali – aty ku e vërteta flet para lajmit!
