Me pjesëmarrje të madhe të qytetarëve, ka përfunduar në Prishtinë “Marshi për Liri”, i organizuar nga platforma qytetare “Liria Ka Emër” në mbështetje të ish-krerëve të Ushtrisë Çlirimtare të Kosovës që po përballen me procesin gjyqësor në Hagë.
Marshi u mbajt sot në sheshin “Skënderbeu”, ndërsa pjesëmarrës nga qytete të ndryshme të Kosovës dhe diaspora iu bashkuan organizimit.
Programi nisi me një hapje artistike nga Arbnora Zogiani, e cila interpretoi këngën “Pa duvak s’ka me u ba nuse”, ndërsa më pas organizimi vazhdoi me fjalimet e përfaqësuesve të platformës “Liria Ka Emër”, Ismail Tashollit dhe Eliza Hoxhës.
Në kuadër të programit folën edhe Hysni Gucati, Lirjona Sylejmani, vajza e dëshmorit të kombit Bajram Sylejmani, si dhe Buna Mustafa, vajza e Sali Mustafës – Calit.
Pjesë e Marshit ishin edhe kryetari i Aleancës për Kosovën, Ardian Gjini, dhe kryetari i Partisë Demokratike të Kosovës, Bedri Hamza.
Atmosfera u shoqërua edhe me muzikë, ku Arif Vladi interpretoi “Marshin e UÇK-së”, ndërsa në përmbyllje Shkurte Fejza këndoi “Mora Fjalë”.
“Marshi për Liri” u mbajt në kohën kur në Hagë po zhvillohet procesi gjyqësor ndaj Hashim Thaçit, Kadri Veselit, Jakup Krasniqit dhe Rexhep Selimit.
Sinjali – aty ku e vërteta flet para lajmit!
