Manchester City është shpallur fajtor për akuzat kryesore për shkelje të rënda të rregullave financiare të Premier League, pas përfundimit të procesit të gjatë të shqyrtuar nga një Komision i Pavarur.
Sipas Premier League, shkeljet lidhen me periudhën nga sezoni 2009/10 deri në 2017/18. Komisioni ka konstatuar se klubi kishte përdorur një numër marrëveshjesh komerciale të cilësuara si “të rreme”, përmes të cilave të ardhurat ishin rritur artificialisht, ndërsa kostot ishin paraqitur më të ulëta se sa ishin në të vërtetë.
Sipas gjetjeve të Komisionit, pjesë e kësaj skeme ishin marrëveshje sponsorizimi në të cilat kompanitë paguanin vetëm një pjesë të shumës së deklaruar, ndërsa pjesa tjetër financohej nga Abu Dhabi United Group (ADUG), entiteti që zotëron klubin.
Komisioni ka arritur në përfundimin se këto marrëveshje kishin ndikuar në mënyrën se si paraqitej gjendja financiare e Manchester Cityt.
Në dokumentet e publikuara nga Premier League thuhet se qëllimi i këtyre marrëveshjeve ishte rritja artificiale e të ardhurave dhe ulja e kostove me më shumë se 900 milionë funte, rreth 1 miliard euro, gjatë periudhës së hetuar, në mënyrë që klubi të paraqitej në përputhje me rregullat financiare.
Komisioni gjithashtu ka konstatuar se Manchester City kishte paraqitur llogari të pasakta dhe nuk kishte raportuar në mënyrë të plotë gjendjen financiare te auditorët dhe rregullatorët e futbollit.
Sipas vendimit, nëse marrëveshjet do të ishin raportuar në mënyrë të saktë, klubi do të kishte shkelur në masë të konsiderueshme limitet e shpenzimeve të Premier League dhe rregullat financiare të UEFA-s.
Një tjetër pjesë e vendimit lidhet me bashkëpunimin e klubit gjatë hetimit. Komisioni ka konstatuar shkelje të shumta të detyrimeve për bashkëpunim me Premier League, ndërsa tre nga katër akuzat për këtë aspekt janë mbështetur nga Komisioni.
Drejtori ekzekutiv i Premier League, Richard Masters, e ka cilësuar vendimin si një prej rasteve më të rëndësishme disiplinore në historinë e kompeticionit. Ai ka thënë se vendimi përcakton faktet lidhur me atë që kishte ndodhur te Manchester City gjatë periudhës së hetuar dhe se tani procesi do të vazhdojë me përcaktimin e sanksionit.
Megjithatë, sanksioni ende nuk është vendosur. Çështja do të trajtohet në një seancë tjetër para Komisionit të Pavarur, e cila do të zhvillohet privatisht dhe konfidencialisht deri në momentin kur rezultati mund të publikohet.
Manchester City ka të drejtë të apelojë vendimin e Komisionit të Pavarur, ndërsa afati për ta bërë këtë është deri më 2 tetor.
Premier League synon që i gjithë procesi, përfshirë çdo apel dhe publikimin e vendimeve përkatëse, të përfundojë sa më shpejt të jetë e mundur.
Sinjali – aty ku e vërteta flet para lajmit!
