Kryeministri i Kosovës, Albin Kurti, është takuar në New York me homologun e tij nga Maqedonia e Veriut, Hristijan Mickoski.
Në fokus të takimit kanë qenë projektet e përbashkëta në infrastrukturë dhe energji, me theks të veçantë te tuneli Prizren-Tetovë.
Kurti ka thënë se gjatë takimit ka kërkuar përshpejtimin e procedurave për realizimin e këtij projekti, të cilin e ka cilësuar me rëndësi për qytetarët e të dyja vendeve, turizmin dhe ekonomitë e tyre.
“Vazhduam bisedën për bashkëpunimin në infrastrukturë e në energji, përkatësisht për avancimin e projekteve të përbashkëta. Theksova rëndësinë e përshpejtimit të procedurave për tunelin Prizren-Tetovë, si projekt me rëndësi të veçantë për qytetarët, sikurse edhe për zhvillimin e turizmit dhe ekonomitë e të dyja vendeve”, ka shkruar Kurti.
Sipas tij, në takim është diskutuar edhe zbatimi i marrëveshjes për thëngjillin.
Kurti dhe Mickoski janë pajtuar që të vazhdojnë punën për projektet e përbashkëta, të cilat, sipas Kurtit, kontribuojnë në ndërlidhjen rajonale dhe sigurinë energjetike.
“Kosova dhe Maqedonia e Veriut, përveçse fqinje, janë shtete mike dhe partnere, me interesa të përbashkëta për paqe, siguri, zhvillim dhe integrim euroatlantik”, ka shkruar Kurti.
Sinjali – aty ku e vërteta flet para lajmit!
