Një studim i ri, i publikuar në revistën shkencore “International Journal of Behavioral Nutrition and Physical Activity”, ka sugjeruar një strategji interesante: të përqendrohesh jo vetëm te ajo se çka ha, por edhe te koha kur ha, ka shkruar Women’s Health.
Kjo qasje ngjan me agjërimin me ndërprerje apo intermitent, por është më fleksibile, sepse nuk kërkon orare strikte.
Sipas studimit, ndryshimi i kohës së vakteve mund të lidhet me indeks më të ulët të masës trupore (BMI) me kalimin e kohës.
Nëse ndihesh sikur po bën gjithçka si duhet, por pesha nuk po bie, ekspertët thonë se koha e të ngrënit mund të jetë një faktor i rëndësishëm, dhe kjo metodë mund të jetë më e lehtë për t’u ndjekur në afat të gjatë.
Disa njerëz humbin peshë më lehtë, por shumë të tjerë kanë nevojë për një qasje më të kujdesshme dhe të menduar mirë për të arritur rezultate dhe për t’i mbajtur ato.
Studiuesit analizuan të dhënat e mbi 7.000 të rriturve, të moshës 40-65 vjeç, në Gjermani. Në fillim, pjesëmarrësit dhanë informacione për gjatësinë, peshën, kohën e vakteve, stilin e jetesës dhe gjendjen socio-ekonomike.
Pas pesë vjetësh, më shumë se 3.000 prej tyre u rikthyen për matje të reja. Kjo u lejoi studiuesve të shohin si kishin ndryshuar zakonet dhe pesha me kalimin e kohës.
Rezultati kryesor: dy zakone u lidhën me BMI më të ulët:
-një periudhë më e gjatë pa ngrënë gjatë natës
-ngrënia e mëngjesit herët
Pra, njerëzit që nuk hanin vonë në mbrëmje dhe hanin mëngjes herët kishin tendencë të kishin peshë më të ulët.
Te gratë me BMI më të ulët, mëngjesi zakonisht konsumohej rreth orës 07:30 dhe kishte rreth 10.5 orë diferencë mes darkës dhe mëngjesit të ditës tjetër. Kjo do të thotë se vakti i fundit mbaronte rreth orës 21:00.
Nga ana tjetër, vonimi i mëngjesit lidhej me BMI më të lartë.
Pse mund të funksionojë kjo metodë?
Studimi tregon një lidhje, por nuk provon se këto zakone janë shkaku i drejtpërdrejtë i dobësimit. Megjithatë, ekspertët kanë disa shpjegime.
“Përpunimi i lëndëve ushqyese në trup, sidomos nga insulina, metabolizmi dhe hormonet e urisë, ndryshon gjatë ditës. Trupi funksionon më mirë gjatë ditës, sidomos në mëngjes, dhe më dobët gjatë natës”, ka shpjeguar dietologia Camille Lassale.
Si rezultat, ngrënia më herët gjatë ditës dhe darka e hershme mund të ndihmojnë në menaxhimin e peshës.
Edhe doktoresha Lisa Moskovitz është në të njëjtën linjë dhe ka thënë se hormonet që rregullojnë oreksin dhe nivelin e sheqerit në gjak ndikojnë drejtpërdrejt në peshë dhe yndyrën trupore.
Ndërkohë, dietologu Mir ALi, ka thënë se ngrënia vonë në mbrëmje shpesh shoqërohet me ngrënie të vogla apo “snacking”, që zakonisht nuk janë zgjedhjet më të shëndetshme.
“Kur kjo bëhet rregullisht, mund të çojë në shtim në peshë”, ka thënë ai.
Si ndryshon kjo nga agjërimi me ndërprerje?
Ani pse duket e ngjashme, kjo qasje nuk është e njëjtë me agjërimin me ndërprerje.
Agjërimi me ndërprerje zakonisht kërkon periudha më të gjata pa ngrënë, për shembull metoda 16:8 (16 orë pa ushqim dhe 8 orë ngrënie).
Ndërsa kjo metodë është më fleksibile dhe më e lehtë për t’u mbajtur.
“Është një qasje më e qëndrueshme”, ka thënë Moskovitz.
Ndërsa Lassale ka shtuar se shumica e pjesëmarrësve në studim nuk po ndiqnin qëllimisht një regjim agjërimi.
Ekspertët theksojnë rëndësinë e vakteve të rregullta dhe kohës që i jep trupit për të tretur ushqimin para gjumit.
“Nuk është ide e mirë të anashkalosh mëngjesin për të zgjatur periudhën pa ngrënë gjatë natës”, ka thënë Lassale.
Në vend të kësaj, ajo rekomandon një mëngjes të rregullt dhe të shëndetshëm dhe një darkë të lehtë dhe sa më herët.
“Nuk ke nevojë për ndryshime drastike për të përmirësuar peshën dhe përqindjen e yndyrës në trup”, ka thënë Moskovitz.
Në thelb, kjo metodë nënkupton që pjesa më e madhe e kalorive të konsumohet në pjesën e parë të ditës.
“Kjo mund të jetë e vështirë në fillim, sidomos nëse je mësuar të hash shumë në darkë dhe të konsumosh ushqime para gjumit”, ka shtuar ajo.
Por, sipas saj, për ata që hanë shumicën e kalorive në mbrëmje ka shumë gjasa që pikërisht këta persona të shohin përmirësimet më të mëdha.
Përfitimet nuk ndalen vetëm te pesha. Sipas ekspertëve, kjo mënyrë të ushqyerje mund të sjellë edhe gjumë më të mirë, më shumë energji, tretje më të mirë dhe më pak dëshirë për ushqim gjatë ditës.
Sinjali – aty ku e vërteta flet para lajmit!
