Tri ditë përballje me forcat serbe, shtatë dëshmorë dhe një ngjarje që mbeti e shënuar në historinë e luftës në Llap.
Sot janë bërë 28 vjet nga Beteja e Kaqanollit, e njohur si përballja e parë frontale e Ushtrisë Çlirimtare të Kosovës me forcat serbe në rajonin e Llapit.
Në 28-vjetorin e kësaj ngjarjeje, shtatë dëshmorët janë nderuar në Varrezat e Dëshmorëve në Penuh të Podujevës, ku janë mbajtur homazhe dhe ceremoni përkujtimore.
Në këtë aktivitet morën pjesë kryetari i Podujevës, Shpejtim Bulliqi, si dhe Nuredin Ibishi, i njohur si Komandant Leka, ish-komandant i UÇK-së në Zonën Operative të Llapit. Të pranishëm ishin edhe familjarë të dëshmorëve dhe qytetarë.
Për tri ditë, në Kaqanoll u zhvilluan luftime të ashpra mes pjesëtarëve të UÇK-së dhe forcave serbe. Përplasja la pas shtatë dëshmorë: Bekim Maliqi, Bekim Lushaku, Nazmi Zhegrova, Fadil Sejdiu, Habib Zeka, Islam Rekaliu dhe Selim Rekaliu.
Më 15 shtator 1998, ata dhanë jetën në front, duke u bërë pjesë e historisë së luftës së Ushtrisë Çlirimtare të Kosovës në Llap.
28 vjet më vonë, emrat e tyre u përmendën sërish pranë varreve ku prehen, në një ceremoni që riktheu në kujtesë tri ditët e luftimeve në Kaqanoll dhe sakrificën e shtatë dëshmorëve në vendin ku prehen, ndërsa emrat e tyre vazhdojnë të jenë pjesë e kujtesës së kësaj treve dhe historisë së luftës së Kosovës.
Sinjali – aty ku e vërteta flet para lajmit!
