Amir Rrahmani dhe Edon Zhegrova kanë zënë vend në formacionin më të mirë të javës së katërt të Serie A, përzgjedhur nga faqja e specializuar për statistika, “SofaScore”.
Rrahmani u dallua të dielën në fitoren 1:0 të Napolit ndaj Bolognas, duke zhvilluar një paraqitje të mirë në qendër të mbrojtjes. Qendërmbrojtësi kosovar u vlerësua me notën 7.7 nga “SofaScore”.
Rrahmani, i cili ditë më parë njoftoi tërheqjen nga ekipi përfaqësues i Kosovës, është përfshirë kështu në formacionin më të mirë të javës në elitën e futbollit italian.
Në të njëjtin formacion është edhe Edon Zhegrova, i cili shkëlqeu me dy gola në ndeshjen e së dielës ndaj Sassuolos, edhe pse Juventusi u mposht me rezultat 3:2.
Paraqitja e sulmuesit kosovar është vlerësuar me notën e lartë 9.2 nga “SofaScore”.
Ndërkohë, një tjetër futbollist kosovar është përfshirë në formacionin më të mirë të javës në një kampionat tjetër evropian.
Ermal Krasniqi është përzgjedhur në formacionin e javës së pestë të Superligës së Turqisë, pas paraqitjes së tij në fitoren bindëse 5:0 të Amedsporit ndaj Bashakshehirit.
Krasniqi kontribuoi në këtë triumf me dy asistime.
Sinjali – aty ku e vërteta flet para lajmit!
