Izraeli thotë se ka vrarë komandantin e Hamasit, Izz ad-Din al-Haddad, të cilin e ka cilësuar si “një nga arkitektët e masakrës së 7 tetorit”, gjatë një sulmi ajror në qytetin e Gazës.
Kryeministri izraelit Benjamin Netanyahu dhe ministri i Mbrojtjes Yisrael Katz thanë në një deklaratë të përbashkët se Haddad kishte qenë “përgjegjës për vrasjen, rrëmbimin dhe plagosjen e mijëra civilëve izraelitë dhe ushtarëve të IDF-së (Forcat e Mbrojtjes së Izraelit)”.
Tre dëshmitarë okularë i thanë BBC-së se një ndërtesë banimi e njohur si Al-Mu’taz u godit nga tre raketa të lëshuara njëkohësisht nga dy drejtime të ndryshme, para se një veturë që po largohej të goditej gjithashtu, raporton BBC – transmeton Sinjali.
Sulmi është i fundit i kryer nga Izraeli në Gaza, pavarësisht armëpushimit me Hamasin.
Hamasi nuk e ka konfirmuar e as mohuar pretendimin se Haddad, komandant i krahut të armatosur të grupit, Brigadave Al-Qassam, është vrarë.
Sulmi ajror, i cili kishte në shënjestër një bllok banesor në qendër të qytetit të Gazës, shkaktoi zjarr të madh.
Ekipet e shpëtimit kanë shkuar në vendngjarje, por sipas dëshmitarëve, kanë hasur vështirësi të mëdha në evakuimin e të plagosurve.
Një dëshmitar i tha BBC-së se një trup dhe disa të plagosur janë nxjerrë nga ndërtesa. Një sulm i dytë ajror, i cili kishte në shënjestër një veturë që po largohej nga vendi i ngjarjes, ka lënë tre të vdekur, sipas dëshmitarëve dhe një burimi lokal.
Sipas burimeve, vetura mund të ketë transportuar Haddadin pasi ai ishte plagosur rëndë në sulmin fillestar.
Dëshmitarët dhe një burim lokal thanë se anëtarë të armatosur të Hamasit, të veshur me rroba civile, kanë evakuuar një person të plagosur rëndë përmes një hyrjeje anësore dhe e kanë vendosur në një veturë.
Sipas dëshmitarëve, vetura është goditur rreth 1.5 km larg ndërtesës së apartamenteve.
Një zyrtar i lartë i sigurisë izraelite tha se informacionet paraprake tregojnë se Haddad është goditur me sukses.
Armëpushimi në Gaza hyri në fuqi më 10 tetor, por Izraeli ka kryer sulme të rregullta në territorin palestinez që prej asaj kohe.
Hamasi ka akuzuar vazhdimisht Izraelin se po shkel kushtet e armëpushimit dhe po sulmon civilët, ndërsa qeveria izraelite thotë se ka të drejtë të shënjestrojë anëtarët e Hamasit.
Sinjali – aty ku e vërteta flet para lajmit!
