Ushtria izraelite (IDF) ka njoftuar se ka vrarë një anëtar të lartë të Hamasit dhe dy militantë të tjerë në një sulm ajror në qytetin e Jeninit, në Bregun Perëndimor.
Sipas IDF-së dhe shërbimit të brendshëm të sigurisë “Shin Bet”, anëtari i Hamasit ishte i përfshirë në financimin dhe organizimin e sulmeve kundër civilëve izraelitë.
Ai dyshohet se ishte gjithashtu përgjegjës për aktivitetet e Hamasit në kampin e refugjatëve në Jenin.
Ushtria izraelite tha se në automjetin ku ndodheshin personat e vrarë janë gjetur armë. Fillimisht, IDF-ja nuk dha detaje për identitetin e dy personave të tjerë që ndodheshin në automjet me anëtarin e Hamasit.
Ngjarja ndodhi në një zonë që ka qenë më parë në qendër të operacioneve ushtarake izraelite. Vitin e kaluar, ushtria izraelite zhvilloi një operacion të gjerë kundër militantëve palestinezë në Jenin dhe në dy kampe të tjera refugjatësh në Bregun Perëndimor.
Gjatë atij operacioni u vranë shumë persona, ndërsa dhjetëra mijëra palestinezë u detyruan të largoheshin nga shtëpitë e tyre. Operacioni shkaktoi edhe dëme të mëdha materiale.
Sipas ushtrisë izraelite, gjatë këtij operacioni u shkatërrua ajo që e quajti “rrjeti terrorist i Jeninit”.
Sinjali – aty ku e vërteta flet para lajmit!
