Vanessa Trump, ish-bashkëshortja e Donald Trump Jr., djalit të madh të presidentit amerikan, ka bërë të ditur se është diagnostikuar me kancer të gjirit, në një postim në rrjetet sociale.
“Edhe pse kjo nuk është lajm që dikush e pret, po punoj ngushtë me ekipin tim mjekësor për një plan trajtimi,” shkroi ajo në Instagram të mërkurën.
Vanessa Trump tha se ka kryer një ndërhyrje mjekësore më herët gjatë kësaj jave dhe kërkoi privatësi nga publiku, ndërsa fokusohet në shëndetin dhe shërimin e saj.
Ajo u nda nga Donald Trump Jr., me të cilin ka pesë fëmijë, në vitin 2018. Vanessa Trump dhe golfisti profesionist amerikan Tiger Woods njoftuan vitin e kaluar se ishin në lidhje.
“Po qëndroj e fokusuar dhe me shpresë, e rrethuar nga dashuria dhe mbështetja e familjes sime, fëmijëve dhe njerëzve më të afërt. Faleminderit për mirësinë dhe mbështetjen, do të thotë shumë më tepër sesa mund ta shpreh,” shkroi ajo.
Postimi i saj mori qindra mesazhe mbështetjeje, përfshirë edhe nga Ivanka Trump, vajza e presidentit amerikan.
“Po lutem për forcën tënde të vazhdueshme dhe një shërim të shpejtë. Të dua mami,” shkroi ajo në postimin e Vanessa Trump.
Vanessa Trump, ish-modele, ishte njohur me ish-bashkëshortin e saj në fillim të viteve 2000, përmes presidentit aktual, raporton BBC – transmeton Sinjali.
“Jam në këtë sfilatë mode,” i tha ajo New York Times në vitin 2006 për takimin me Donald Trump Jr. “Donald Trump erdhi tek unë me djalin e tij: ‘Përshëndetje, unë jam Donald Trump. Dua të të prezantoj me djalin tim, Donald Trump Jr.’”
Çifti u martua në vitin 2005 në Mar-a-Lago, rezidenca e presidentit në Florida.
Tani të divorcuar, ata kanë pesë fëmijë, të moshave nga 11 deri në 19 vjeç. Vajza e tyre 19-vjeçare, Kai Trump, ka një ndjekje të madhe në rrjetet sociale dhe është parë shpesh në Shtëpinë e Bardhë me gjyshin e saj.
Sipas Shoqatës Amerikane të Kancerit, rreziku mesatar që një grua në SHBA të zhvillojë kancer të gjirit është rreth 1 në 8, ose 13%. Kjo sëmundje përbën gjithashtu rreth 30% të të gjitha kancereve të reja te gratë çdo vit.
Kirurgjia shëron shumicën e rasteve të kancerit të gjirit, por nëse mbetet sëmundje, kimioterapia, radioterapia dhe terapia hormonale mund të ulin rrezikun afatgjatë të vdekjes.
Trajtimet janë duke u përmirësuar vazhdimisht, duke përfshirë terapi më të targetuara për kancerin e hershëm të gjirit, lloje të reja të terapisë hormonale dhe radioterapi më të saktë dhe më efektive.
Sinjali – aty ku e vërteta flet para lajmit!
