Autoritetet iraniane kanë bërë të ditur se trafiku detar në Ngushticën e Hormuzit po rifillon gradualisht, por pa zbuluar detajet e anijeve që lejohen të kalojnë nëpër këtë korridor strategjik.
Sipas televizionit shtetëror iranian, që nga mbrëmja e kaluar, të paktën 30 anije kanë marrë leje për të kaluar ngushticën.
Ndërkohë, agjencia iraniane e lajmeve “Fars” raporton se disa prej anijeve u përkasin kompanive kineze, çka, sipas raportimeve, lidhet me strategjinë e re të Iranit për kontrollin e Ngushticës së Hormuzit.
Zyrtarë iranianë kanë theksuar se ngushtica nuk është as plotësisht e hapur dhe as plotësisht e mbyllur.
“Është e hapur për të gjithë, përveç SHBA-së dhe aleatëve të saj”, thanë ata, duke shtuar se Irani po zbaton një “strategji të madhe” në këtë zonë strategjike.
Ngushtica e Hormuzit konsiderohet një nga arteriet më të rëndësishme të transportit të naftës në botë, pasi përmes saj kalon rreth 20 për qind e naftës së papërpunuar globale.
Vendimi i Iranit vjen në një kohë tensionesh të larta në rajon.
Sinjali – aty ku e vërteta flet para lajmit!
