Irani ka mohuar deklaratat e presidentit amerikan Donald Trump, i cili tha se bisedimet për t’i dhënë fund konfliktit mes dy vendeve do të nisnin të hënën.
Gjatë një deklarate në bordin e avionit presidencial Air Force One, Trump u shpreh se SHBA-ja ishte në prag të një sulmi të madh ndaj Iranit, por vendosi të mos e ndërmarrë atë pasi, sipas tij, Teherani dhe aleatët amerikanë në Lindjen e Mesme kërkuan kohë për negociata.
Ai tha se ekziston një mundësi për arritjen e një marrëveshjeje, si për çështjen e Ngushticës së Hormuzit, ashtu edhe për programin bërthamor iranian.
Megjithatë, Ministria e Jashtme e Iranit i hodhi poshtë këto pretendime. Zëdhënësi i saj, Esmaeil Baghaei, deklaroi se nuk ka negociata me Shtetet e Bashkuara dhe as ndonjë plan për nisjen e tyre.
Sipas tij, Teherani është duke zhvilluar bisedime vetëm me Omanin, me qëllim garantimin e sigurisë së lundrimit në Ngushticën e Hormuzit.
Edhe agjencia iraniane e lajmeve Mehr mohoi pretendimet se Irani i kishte kërkuar SHBA-së të pezullonte veprimet ushtarake, duke i cilësuar deklaratat e Trump si “një tjetër gënjeshtër”.
Pas komenteve të presidentit amerikan, tregjet ndërkombëtare reaguan menjëherë. Çmimi i naftës Brent ra me 4.5 për qind, ndërsa nafta amerikane WTI shënoi rënie prej 4.6 për qind në tregjet aziatike.
Ngushtica e Hormuzit mbetet një nga rrugët më strategjike për furnizimin global me energji, pasi rreth 20 për qind e naftës bruto dhe gazit natyror të lëngshëm transportohen përmes saj.
Sinjali – aty ku e vërteta flet para lajmit!
