Një pasagjer i një fluturimi të Flydubai ka treguar momentet e tensionuara gjatë një incidenti në bord, duke përshkruar mënyrën se si ai dhe disa udhëtarë të tjerë ndërhynë për ta ndaluar një person të dyshuar për sulm ndaj ekuipazhit.
Yaniv Hayoun, i cili të mërkurën u takua me kryeministrin izraelit Benjamin Netanyahu, tha se u nis drejt kabinës së pilotëve pasi mësoi se njëri prej tyre ishte plagosur dhe ndodhej pranë derës.
Kur hyri brenda, sipas rrëfimit të tij, të dy pilotët nuk ishin në vendet e tyre. Ndërkohë, personi i dyshuar ndodhej pranë panelit të komandimit dhe dukej se po ndërhynte në kontrollet e avionit.
Hayoun tregoi se thirri pasagjerë të tjerë për ndihmë.
“Thirra disa izraelitë që ndodheshin në bord dhe dy persona të tjerë erdhën. E mbajtëm të shtrirë”, tha ai.
Më pas, sipas tij, ai e kapi të dyshuarin dhe e nxori nga kabina. Menjëherë pas kësaj, u kthye te komandat e avionit.
“U ktheva, kapa komandat dhe fillova t’i tërhiqja pas”, rrëfeu Hayoun, duke thënë se gjithçka ndodhi brenda pak sekondash.
Ai tregoi se kishte frikë se situata mund të përkeqësohej nëse avioni do të hynte në hapësirën ajrore të Izraelit pa qenë nën kontroll.
Kur u pyet se si dinte të vepronte me komandat e avionit, Hayoun u përgjigj me humor se ishte frymëzuar nga një serial televiziv.
“Shikoj ‘Air Crash Investigation’, zoti kryeministër – vërtet!”, tha ai.
Rrëfimi u bë gjatë takimit me Netanyahun, ku u diskutua ndërhyrja e pasagjerëve për ndalimin e personit të dyshuar dhe ndihma e tyre në rikthimin e kontrollit të avionit.
Sinjali – aty ku e vërteta flet para lajmit!
