Të martën nuk shënoi gol, por Vedat Muriqi vazhdon të jetë shumë i përfolur në Spanjë.
Pasi u lidh me një kalim të mundshëm te Barcelona, Muriqi të martën u bë temë edhe në Turqi. Gjiganti turk, Fenerbahçe, ka shprehur interesim për sigurimin e shërbimeve të sulmuesit kosovar. Madje, mediume të ndryshme turke kanë raportuar se Fenerbahçe tashmë ka arritur marrëveshje në parim me Muriqin, ndërsa për kthimin e tij në klubin nga Stambolli ka mbetur vetëm marrëveshja me Mallorcan.
Marrëveshja, megjithatë, nuk pritet të jetë e lehtë.
Mediumi “Ultima Hora”, i afërt me Mallorcan, ka shkruar se për Muriqin çmimi minimal është 30 milionë euro.
Agjenti i Muriqit, Utku Cenikli, ishte i pranishëm në stadiumin “Son Moix” për ndeshjen e Mallorcas me Valencian. Ai zakonisht nuk i ndjek ndeshjet në stadium, por u shfaq në një kohë kur po rriten zërat për largimin e “Piratit” nga ishulli.
“Vizita e tij në Spanjë nuk duket të jetë rastësi pasi vjen në një kohë kur klienti i tij po lidhet me klube të mëdha, me Barcelonën që është një nga ekipet që ka shprehur interesim për kontratën e lojtarit dhe tarifën e mundshme të transferimit”, ka shkruar Ultima Hora.
Muriqi ka shënuar 21 gola këtë edicion në La Liga dhe po thyen rekordet e Mallorcas.
“Megjithatë, një largim i mundshëm nuk do të jetë i lehtë – çmimi minimal është vendosur në 30 milionë euro”, ka shkruar mediumi spanjoll.
Mallorca aktualisht dëshiron ta mbajë sulmuesin. Transferimi i Muriqit do të ishte i ndërlikuar, pasi Lazio mban përqindje të konsiderueshme të fitimit neto nga çdo shitje e ardhshme. Sipas “Ultima Hora”, kjo shifër është 45 për qind.
“Me fjalë të tjera, nëse Mallorca e shet Muriqin për 30 milionë euro, ajo do të mbulonte investimin prej 7,5 milionë euro dhe shtesat që kalojnë 1 milion euro. Dhe fitimi i mbetur do të ndahej mes Mallorcas me 55 për qind dhe Lazios me 45 për qind”.
Lazio është ish-klubi i Muriqit, prej të cilit u transferua te Mallorca.
Fenerbahçe e ka kërkuar Muriqin edhe në dimër, ndërsa sulmuesi e kishte lënë këtë çështje në duart e drejtuesve të klubit spanjoll. Mallorca atëkohë kishte refuzuar të hiqte dorë nga ai.
Derisa interesimi për Muriqin po rritet, largimi i tij nga Mallorca mund të realizohet vetëm për një dëmshpërblim prej të paktën 30 milionë eurosh. Ai ka kontratë edhe për tri vjet.
Në barazimin 1:1 me Valencian, të martën, Muriqi ishte aktiv por pa realizuar gol. Valencia ishte mjaft e fokusuar në ndalimin e tij.
“Kanë filluar të marrin shënime për të pasi është një nga golashënuesit më të mirë të ligës. Po analizojnë çdo lëvizje të tij. Ne duhet të përfitojmë nga kjo. Ata u morën shumë me Muriqin dhe ne dolëm me armë të tjera. Kemi shënuar tjetër gol nga ndërprerjet”, ka theksuar trajneri i Mallorcas, Martin Demichelis.
Sinjali – aty ku e vërteta flet para lajmit!
