Ballkani ka marrë një fitore të rëndësishme në javën e 31-të të Superligës së Kosovës në futboll, duke e mposhtur Drenicën me rezultat 2:1 në stadiumin “Bajram Aliu” në Skenderaj. Po ashtu, fitore ka shënuar edhe Dukagjini ndaj Ferizajt.
Skuadra nga Suhareka ka kaluar në epërsi në minutën e 36-të me një gol nga goditja e lirë e realizuar nga Toni Domgjoni. Mysafirët e kanë dyfishuar avantazhin në minutën e 54-t, kur Festim Alidema ka shënuar pas asistimit të Almir Kryeziut.
Drenica është rikthyer në lojë në minutën e 79-të me golin e Igball Jasharit. I njëjti lojtar ka fituar penallti në minutat shtesë pas ndërhyrjes së VAR-it, ndërsa nga pika e bardhë ka provuar Ronaldo Chacon, por portieri Adnan Goluboviq e ka pritur goditjen, duke i siguruar Ballkanit tri pikët.
Pas kësaj fitoreje, Ballkani shkon në 55 pikë dhe vazhdon garën për titull, pesë pikë prapa liderit Drita. Drenica mbetet e shtata me 38 pikë dhe vazhdon betejën për mbijetesë.
Në ndeshjen tjetër të ditës, Dukagjini ka fituar si mysafir ndaj Ferizajt me rezultat 2:1.
Klinasit kanë kaluar në epërsi në minutën e 41-të me golin e Hekuran Kryeziut, ndërsa Dienit Isufi ka realizuar për 2:0 në minutën e 51-të. Ferizaj e ka ngushtuar rezultatin në minutën e fundit me Betim Haxhimusën, por nuk ka arritur ta shmangë humbjen.
Ferizaj nga minuta e 78-të ka luajtur me një futbollist më pak, pasi Ruben Cornelious është ndëshkuar me karton të kuq.
Me këtë fitore, Dukagjini ngjitet në vendin e gjashtë me 41 pikë dhe largohet nga zona e rrezikut. Ferizaj mbetet në pozitën e parafundit me 33 pikë.
Këto dy skuadra do të përballen sërish në finalen e Kupës së Kosovës më 21 maj në stadiumin “Fadil Vokrri”.
Sinjali – aty ku e vërteta flet para lajmit!
