Një konflikt familjar në Kaçanik ka përfunduar me arrestim, pasi një person dyshohet se i dërgoi vëllait të tij mesazhe kërcënuese dhe fyese përmes e-mailit, ndërsa gjatë bastisjes në shtëpi Policia gjeti edhe substancë narkotike, mëson Sinjali nga burime të afërta me hetimin.
Burimet bëjnë të ditur se i dyshuari në këtë rast është H. Ç (34 vjeç), ndërsa viktimë figuron vëllai i tij, G. Çaka (30 vjeç).
Sipas informatave, ankuesi është paraqitur në Stacionin Policor në Kaçanik më 16 maj 2026 rreth orës 14:00, duke raportuar se vëllai i tij i kishte dërguar më herët gjatë ditës e-mail me përmbajtje fyese dhe kërcënuese.
Sinjali mëson se viktima kishte deklaruar para Policisë se ishte ndjerë i rrezikuar nga mesazhet, ndërsa kishte treguar po ashtu se i dyshuari kishte sjellje të dhunshme në shtëpi dhe kishte dëmtuar orenditë familjare.
Burimet bëjnë të ditur se gjatë kontrollit në shtëpinë e të dyshuarit, Policia ka gjetur:
- gjësende të thyera,
- si dhe substancë të dyshuar narkotike të llojit marihuanë në dhomën e gjumit.
Sipas deklarimeve të familjarëve, i dyshuari kohëve të fundit kishte shfaqur çrregullime mendore dhe kishte refuzuar trajtimin mjekësor.
Gjatë intervistimit, Hekuran Çaka ka pranuar se kishte sharë familjarët, por ka mohuar se i kishte kanosur ata. Sipas tij, sjelljet e tij kishin ardhur si pasojë e distancimit të familjes dhe presionit psikik, ndërsa ka përmendur edhe dhimbje të vazhdueshme të dhëmbëve për të cilat kishte marrë trajtim.
Me urdhër të Prokurorit kujdestar, rasti është iniciuar si: “Kanosje” në kuadër të dhunës në familje, dhe “Posedim i paautorizuar i narkotikëve, substancave psikotrope ose analoge”.
Pas intervistimit, i dyshuari është ndaluar për 48 orë.
Sinjali – aty ku e vërteta flet para lajmit!
