Një kompani telefonike e lidhur me biznesin familjar të presidentit amerikan Donald Trump, Trump Mobile, ka nisur një hetim pas dyshimeve për një të metë sigurie në faqen e saj zyrtare që mund të ketë ekspozuar të dhënat personale të mijëra klientëve.
Sipas raportimeve, incidenti dyshohet se ka prekur rreth 27,000 persona që kishin shprehur interes për blerjen e një telefoni inteligjent me ngjyrë ari. Kompania ka konfirmuar se është duke e trajtuar rastin dhe se hetimet janë ende në zhvillim.
Në deklaratën e saj, Trump Mobile thekson se deri më tani nuk ka prova që sistemet e brendshme, infrastruktura apo rrjeti i kompanisë janë kompromentuar drejtpërdrejt. Po ashtu, sipas kompanisë, nuk janë prekur të dhëna bankare, mesazhe, thirrje apo informacione të tjera financiare të ndjeshme.
Megjithatë, sipas të dhënave fillestare, informacioni i ekspozuar mund të përfshijë emra, adresa email-i, adresa postare, numra telefoni dhe detaje të porosive.
Kompania ka njoftuar se ka forcuar masat e sigurisë dhe po vlerëson detyrimet ligjore për njoftimin e përdoruesve të prekur, duke u bërë thirrje klientëve të tregojnë kujdes ndaj mesazheve apo thirrjeve të dyshimta.
Incidenti ka ndodhur në të njëjtën periudhë kur kompania ka filluar shpërndarjen e telefonit inteligjent T1, pas një vonese disa mujore në lansim.
Sinjali – aty ku e vërteta flet para lajmit!
