Këngëtarja me famë botërore Dua Lipa dhe aktori britanik Callum Turner raportohet se janë martuar në një ceremoni të thjeshtë ligjore në Londër, të mbajtur në Old Marylebone Town Hall.
Dua Lipa u shfaq e veshur me një kostum të bardhë elegant, të kombinuar me fund dhe kapelë, ndërsa mbante një buqetë me lule të verdha. Ndërkohë, Callum Turner ishte i veshur me kostum blu të errët.
Çifti u pa duke dalë dorë për dore nga zyra e regjistrimit, duke konfirmuar kështu hapin e tyre të rëndësishëm në marrëdhënie, pas publikimit të romancës në vitin 2024 dhe fejesës së mëvonshme.
Pas ceremonisë në Londër, ata pritet të organizojnë një festë madhështore martese në Itali, në Palermo të Sicilisë, e cila do të zgjasë tre ditë.
Sipas raportimeve, festa luksoze do të përfshijë ambiente ekskluzive në Villa Igiea, ndërsa ceremonia kryesore mund të mbahet në vilën historike Villa Valguarnera në Bagheria.
Në listën e të ftuarve përmenden emra të njohur të muzikës dhe modës, ndër ta Elton John, Mark Ronson, Charli XCX, Donatella Versace dhe Simon Porte Jacquemus.
Raportohet gjithashtu se Dua Lipa mund të veshë një fustan të personalizuar nga Versace për ditën e saj të madhe.
Sinjali – aty ku e vërteta flet para lajmit!
