Një avion nga Parisi drejt Detroitit është detyruar të devijojë dhe të ulet në Kanada pasi një pasagjer nga Republika Demokratike e Kongos, e cila po përballet me shpërthim të Ebola-s, kishte hipur në aeroplan “gabimisht”, kanë thënë zyrtarët.
Shërbimi amerikan i Doganave dhe Mbrojtjes së Kufirit (CBP) i ka thënë BBC-së se kufizimet e hyrjes në SHBA, të vendosura për të kufizuar përhapjen e virusit vdekjeprurës, nënkuptonin që pasagjeri nuk duhej të ishte lejuar të hipte në avionin e Air France.
Air France konfirmoi për mediat amerikane se, me kërkesë të autoriteteve amerikane, fluturimi u devijua drejt aeroportit të Montrealit pasi një pasagjer nga Republika Demokratike e Kongos u refuzua për hyrje në SHBA, raporton BBC – transmeton Sinjali.
CBP tha se linja ajrore kishte lejuar gabimisht një pasagjer nga Republika Demokratike e Kongos të hipte në fluturim drejt Shteteve të Bashkuara. Agjencia shtoi se ndërmori “veprime vendimtare” për të mos lejuar uljen e avionit në Aeroportin Detroit Metropolitan Wayne County. Fluturimi u devijua rreth 500 milje (800 km) drejt Montrealit, Kanada.
SHBA po zbaton kufizime hyrjeje për personat pa pasaportë amerikane që kanë qenë në Republikën Demokratike të Kongos, Sudanin e Jugut ose Ugandën gjatë tre javëve të fundit.
Qytetarët amerikanë dhe rezidentët e përhershëm që kanë qenë në këto vende mund të hyjnë vetëm përmes Aeroportit Ndërkombëtar Washington-Dulles në Virxhinia, ku bëhen kontrolle të shtuara.
Shpërthimi aktual i Ebola-s është shpallur emergjencë shëndetësore me rëndësi ndërkombëtare nga Organizata Botërore e Shëndetësisë.
Qendra amerikane për Kontrollin dhe Parandalimin e Sëmundjeve (CDC) ka thënë se rreziku për SHBA-në është relativisht i ulët, por po merren masa për të parandaluar hyrjen e sëmundjes në vend.
Një amerikan ka rezultuar pozitiv me Ebola – një mjek që po punonte me një grup misionar në Republikën Demokratike të Kongos. Ai po trajtohet në izolim në një spital në Gjermani.
Sinjali – aty ku e vërteta flet para lajmit!
