Aleanca për Ardhmërinë e Kosovës, ka kritikuar Qeverinë e Kosovës për ndërhyrje politike dhe dështime në menaxhimin e kompanive publike.
Në një reagim zyrtar, AAK-ja, shprehu shqetësimin për shkeljet e rënda dhe mungesën e përgjegjshmërisë nga bordet e këtyre kompanive, transmeton klankosova.tv.
Një rast i veçantë i keqmenaxhimit, sipas AAK-së, është ai i Kompanisë Rajonale të Ujësjellësit (KRU) Hidromorava, ku sipas saj, bordi ka dështuar të përmbushë objektivat e Planit të Biznesit dhe ka lejuar përdorimin personal të automjetit zyrtar nga Kryeshefi Ekzekutiv.
Gjithashtu, AAK ka ngritur shqetësimin për kandidimin e kryesueses së bordit të KRU Hidromorava në bordin e Korporatës Energjetike të Kosovës (KEK), duke e lidhur këtë me afërsinë e saj me partinë në pushtet.
”E ardhmja e kompanive publike nuk duhet të jetë peng i interesave personale dhe politike, por duhet të bazohet në transparencë, profesionalizëm dhe përkushtim ndaj interesit publik”, theksohet në reagimin e tyre.
Partia kërkoi ndalimin e menjëhershëm të ndërhyrjeve politike dhe zbatimin e masave për garantimin e menaxhimit të drejtë dhe përgjegjshmërisë në këto kompani.
*Klikoni KËTU për t´u bërë pjesë e kanalit zyrtar të Klan Kosovës në Viber.
*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.
<!–
–>
