Një zyrtar i lartë i Kombeve të Bashkuara ka dënuar glorifikimin publik të kriminelit të luftës Ratko Mlladiq dhe mohimin e gjenocidit në Srebrenicë, duke shprehur shqetësim për përkujtimet në nderim të tij në Serbi dhe Bosnjë e Hercegovinë.
Chaloka Beyani, nënsekretar i përgjithshëm i OKB-së dhe këshilltar special për Parandalimin e Gjenocidit, tha se ishte i shqetësuar për shprehjet publike që lavdërojnë Mlladiçin dhe krimet e tij.
“Përkujtimi publik në shkallë të gjerë i Mlladiqit, duke përfshirë pjesëmarrjen e figurave politike dhe elementëve zyrtarë ceremonialë, është thellësisht i papërshtatshëm dhe thellësisht shqetësues”, tha Beyani në një deklaratë.
Sipas tij, këto përkujtime relativizojnë krimet e rënda të përcaktuara nga e drejta ndërkombëtare dhe cenojnë dinjitetin e viktimave, të mbijetuarve dhe familjeve të tyre.
Beyani tha gjithashtu se përkujtimet në nderim të Mlladiqit janë të papajtueshme me përpjekjet për të promovuar llogaridhënien, mirëkuptimin e ndërsjellë dhe paqen e qëndrueshme në rajon.
Tribunali Ndërkombëtar për Krime në ish-Jugosllavi (ICTY) dhe Gjykata Ndërkombëtare e Drejtësisë kanë përcaktuar se në Srebrenicë, në vitin 1995, është kryer gjenocid.
Mlladiç, i cili ishte komandant i Ushtrisë së Republika Srpska gjatë Luftës së Bosnjës, u dënua nga ICTY në vitin 2017 për gjenocid, krime kundër njerëzimit dhe shkelje të ligjeve ose zakoneve të luftës.
Ai u dënua me burgim të përjetshëm. Dhoma e Apelit e Mekanizmit Ndërkombëtar të Mbetur për Tribunalet Penale e mbështeti dënimin e tij në qershor të vitit 2021.
Beyani theksoi se dënimi i Mlladiçit përcaktoi përgjegjësi penale individuale dhe se krimet e tij nuk mund t’i atribuohen kolektivisht një komuniteti të tërë.
“Faktet e përcaktuara nga ICTY nuk shuhen me vdekjen e dikujt”, tha ai.
Komentet e tij pasuan vdekjen e Mlladiçit. Beyani iu referua edhe një deklarate të mëparshme të Sekretarit të Përgjithshëm të OKB-së, Antonio Guterres, i cili u bëri thirrje personave në pozita pushteti që të përmbahen nga mohimi i seriozitetit të krimeve të Mlladiçit.
Këshilltari special shprehu shqetësim për atë që e përshkroi si vazhdimësi dhe rritje të mohimit të gjenocidit, si dhe për pjesëmarrjen e zyrtarëve publikë dhe institucioneve në glorifikimin e Mlladiçit dhe krimeve të tij.
“Ndërtimi i një shoqërie që i jep përparësi parandalimit të krimeve mizore fillon me pohimin e realitetit dhe të vërtetës së asaj që ka ndodhur në të kaluarën”, tha Beyani.
Ai tha se njerëzit në rajon meritojnë një të ardhme pa frikë dhe se trashëgimia e luftës duhet të shërbejë për të forcuar përpjekjet për të parandaluar përsëritjen e mizorive të ngjashme.
Sinjali – aty ku e vërteta flet para lajmit!
