Shtetet e Bashkuara kanë propozuar që Emiratet e Bashkuara Arabe të presin një takim trepalësh mes Ukrainës dhe Rusisë, me pjesëmarrjen e SHBA-së, për të diskutuar përpjekjet për t’i dhënë fund luftës.
Presidenti ukrainas, Volodymyr Zelensky, ka bërë të ditur se propozimi amerikan është për një takim në nivel teknik, ndërsa Ukraina është në pritje të një date konkrete.
“Pala amerikane ka propozuar një takim në nivel teknik, në format trepalësh”, u tha Zelensky gazetarëve gjatë një konference përmes WhatsApp-it.
Sipas Zelenskyt, Emiratet e Bashkuara Arabe janë sugjeruar si një nga vendet ku mund të zhvillohet takimi, ndërsa Ukraina pret propozimin e SHBA-së për datën.
Zelensky u takua këtë javë me presidentin amerikan, Donald Trump, në margjinat e Asamblesë së Përgjithshme të Kombeve të Bashkuara në Nju Jork. Sipas tij, gjatë takimit u diskutuan mënyrat për t’i dhënë fund luftës, e cila nisi me pushtimin e plotë rus të Ukrainës në shkurt të vitit 2022.
Pas takimit me Trumpin, negociatorët ukrainas zhvilluan bisedime me përfaqësuesit amerikanë për detaje konkrete.
“Ne do t’i informojmë dhe do t’i diskutojmë këto detaje me palën evropiane, ndërsa amerikanët do të bisedojnë me rusët. Pas dhjetë ditësh do të rikthehemi me një perspektivë të re ose me një rezultat”, tha Zelensky.
Ndërkohë, Kremlini ka deklaruar se një takim trepalësh me Ukrainën dhe Shtetet e Bashkuara mund të zhvillohet së shpejti.
Zelensky tha gjithashtu se i ka kërkuar Trumpit që ta ngrejë çështjen e luftës në Ukrainë gjatë bisedimeve të tij me presidentin kinez, Xi Jinping.
Presidenti ukrainas tha se është ende në pritje të përgjigjeve nga ekipi amerikan, veçanërisht për përpjekjet për të ulur tensionet para dimrit.
Sinjali – aty ku e vërteta flet para lajmit!
