Presidenti i Ukrainës, Volodymyr Zelensky, ka deklaruar se sinjalet e marra nga inteligjenca ukrainase dhe ajo e vendeve aleate tregojnë se presidenti rus, Vladimir Putin, mbetet i vendosur për vazhdimin e luftës në Ukrainë.
Në një video-adresim të hënën, Zelensky tha se nevojitet që Moska të ndryshojë qasjen dhe të fokusohet në përfundimin e luftës, e jo në vazhdimin e saj.
“Ne kemi nevojë që Putini dhe Moska të kenë mendësinë për t’i dhënë fund luftës, jo për të vazhduar luftën”, tha Zelensky.
Ai gjithashtu iu referua kontakteve me përfaqësuesit e presidentit amerikan Donald Trump, Steve Witkoff dhe Jared Kushner, me të cilët zhvilloi një bisedë që e cilësoi si të detajuar dhe konstruktive.
Zelensky tha se zhvillimet diplomatike gjatë shtatorit mund të jenë të rëndësishme.
“Do të shohim se çfarë mund të arrijnë të dërguarit e Presidentit të SHBA-së. Shtatori mund të ndryshojë shumë dhe, së bashku me partnerët tanë, duhet të bëjmë gjithçka që është e mundur për të mbrojtur njerëzit, për të mbrojtur jetët dhe për të arritur paqen”, deklaroi ai.
Sinjali – aty ku e vërteta flet para lajmit!
