Presidenti ukrainas Volodymyr Zelensky ka konfirmuar se forcat e mbrojtjes së Ukrainës kanë goditur një rafineri nafte në qytetin rus Saratov, rreth 700 kilometra larg vijës së frontit.
Sipas Zelenskyt, sulmi është pjesë e operacioneve afatgjata të Ukrainës ndaj infrastrukturës energjetike ruse, të cilat ai i quajti “sanksione të brendshme” kundër Rusisë.
Ai tha se sulmi në Saratov ka qenë “një rezultat i rëndësishëm”, duke falënderuar forcat ukrainase për veprimin.
Sipas tij, gjatë të njëjtës periudhë janë raportuar edhe sulme në rajonet Rostov dhe Kirov, si dhe në një bazë ushtarake në bregdetin e Detit Kaspik.
Zelensky shtoi se objektiva të tjerë janë goditur edhe në rajone të ndryshme të Rusisë, përfshirë Yaroslavl, Ryazan, Voronezh, Volgograd, Novgorod, Nizhny Novgorod dhe Krasnodar, në distanca të ndryshme nga kufiri ukrainas.
Ndërkohë, mediat raportojnë se sulmi në rafinerinë e Saratovit ka shkaktuar zjarr të madh në territorin e objektit, pas goditjes me dronë.
Autoritetet ruse nuk kanë dhënë ende një konfirmim të detajuar për dëmet e shkaktuara.
Sinjali – aty ku e vërteta flet para lajmit!
