Viagra mund të bëjë më shumë sesa vetëm t’u japë burrave një përmirësim në jetën seksuale, pasi një hulumtim i ri sugjeron se mund të ketë përfitime edhe për pacientët me kancer.
Medikamenti me recetë, i cili prodhohet dhe shpërndahet nga kompania Viatris, përdoret zakonisht për trajtimin e disfunksionit erektil, duke rritur qarkullimin e gjakut gjatë stimulimit seksual.
Fillimisht, ilaçi ishte zhvilluar për trajtimin e presionit të lartë të gjakut dhe dhimbjeve në gjoks të shkaktuara nga qarkullimi i reduktuar i gjakut në zemër, por studiuesit zbuluan më vonë efektin e tij të papritur në funksionin erektil gjatë provave klinike.
Një studim i ri i publikuar nga Shoqata Amerikane për Kërkimet mbi Kancerin (American Association for Cancer Research) ka zbuluar se pilula mund të ketë veti që ndihmojnë në parandalimin e përhapjes së kancerit.
Studiuesit në Institutin Weizmann të Shkencës në Izrael, të udhëhequr nga Dr. Yarden Ariav në laboratorin e profesoreshës Ayelet Erez, zbuluan se përbërësi aktiv i Viagrës – sildenafil, një frenues i enzimës PDE5 – mund të kufizojë metastazat e kancerit, pra formimin e tumoreve të reja në pjesë të tjera të trupit,shkruan fox5ny.
Ekipi i hulumtuesve, ku përfshiheshin edhe shkencëtarë nga Instituti Kombëtar i Kancerit në SHBA, analizoi qeliza kanceroze njerëzore dhe të minjve, eksperimente gjenetike, si dhe të dhëna shëndetësore 20-vjeçare nga 5 milionë anëtarë të Clalit Health Services, ofruesi më i madh jofitimprurës i kujdesit shëndetësor dhe sigurimeve shëndetësore në Izrael.
Ata shqyrtuan gjithashtu mënyrën se si ndërveprojnë gjenet, proteinat, yndyrat, kolesteroli dhe energjia qelizore.
Analiza tregoi se sildenafil-i kufizon aftësinë e qelizave kancerogjene për të përdorur kolesterolin, i cili është një mekanizëm i rëndësishëm në procesin kur qeliza shkëputet nga tumori fillestar dhe përhapet në pjesë të tjera të trupit, sipas një njoftimi nga Komiteti Amerikan për Institutin Weizmann të Shkencës.
Sipas studiuesve, sildenafil-i bllokon një enzimë të quajtur fosfodiesteraza e tipit 5 (PDE5) dhe rrit nivelin e molekulës sinjalizuese cGMP, e cila zgjeron enët e gjakut – mekanizëm që e ka bërë Viagrën një trajtim të suksesshëm për disfunksionin erektil.
Studiuesit thanë se cGMP lidhet gjithashtu me një proteinë që transporton kolesterolin brenda qelizave, duke zvogëluar sasinë e kolesterolit të disponueshëm për funksionet jetike qelizore.
Sipas tyre, qelizat kancerogjene janë “veçanërisht të ndjeshme ndaj këtij reduktimi të furnizimit me kolesterol”.
Bazuar në këto gjetje, studiuesit sugjeruan se kombinimi i barnave të ngjashme me Viagrën me statina, të cilat ulin nivelin e kolesterolit, mund të ndihmojë në ngadalësimin e përhapjes së kancerit duke kufizuar furnizimin e qelizave tumorale me kolesterolin ekzistues dhe atë të prodhuar rishtazi.
“Ne kemi zbuluar një rrugë të re biologjike që lidh një molekulë të njohur sinjalizuese me rregullimin e kolesterolit brenda qelizave dhe kemi treguar se si kjo rrugë mund të përdoret për të ndërhyrë në aftësinë e qelizave kancerogjene për të formuar metastaza”, tha Ayelet Erez, hulumtuese e lartë dhe dekane e Shkollës Mjekësore Miriam dhe Aaron Gutwirth në Institutin Weizmann, në një deklaratë.
“Përtej potencialit të tyre terapeutik, gjetjet tona tregojnë se biologjia e kancerit nuk përcaktohet vetëm nga mutacionet në qelizat tumorale, por edhe nga gjendja metabolike e pacientit dhe nga medikamentet që ai tashmë i përdor për sëmundje të tjera”, shtoi studiuesja.
Ajo theksoi se ky studim “nënvizon rëndësinë e trajtimit të të gjithë pacientit – jo vetëm të kancerit – kur përshtatet terapia më efektive”.
Megjithatë, studiuesit pranuan se përdorimi i modeleve me minj mund të jetë një kufizim për përfundimet përfundimtare, pasi trajtimet kundër kancerit nuk përkthehen gjithmonë në të njëjtën mënyrë te njerëzit.
Edhe të dhënat nga njerëzit janë vëzhguese, që do të thotë se tregojnë një lidhje mes faktorëve, por jo domosdoshmërisht një shkak dhe pasojë të provuar.
Sinjali – aty ku e vërteta flet para lajmit!
