Katër persona janë vrarë nga një ushtar në Krimenë e aneksuar nga Rusia, në një sulm me armë që duket se ka qenë i rastësishëm.
Guvernatori rajonal i vendosur nga Moska, Mikhail Razvozhayev, tha se personi i armatosur hapi zjarr ndaj kolegëve të tij ushtarë, duke vrarë një prej tyre dhe duke plagosur një tjetër.
Më pas, ai vrau tre civilë në fshatin Khmelnytske – dy burra, të moshave 71 dhe 59 vjeç, si dhe një grua 64-vjeçare. Tre persona të tjerë gjithashtu mbetën të plagosur, raporton BBC – transmeton Sinjali.
Sulmuesi është arrestuar, ndërsa motivi i të shtënave po hetohet, tha Razvozhayev.
Identiteti i tij nuk është bërë publik dhe zyrtarët lokalë nuk kanë dhënë informacione se në cilën degë të forcave të armatosura ruse shërbente ai.
Nuk është e qartë nëse numri i viktimave pritet të rritet. Razvozhayev tha se mjekët “po bëjnë gjithçka të mundur për të shpëtuar” personat e plagosur në sulm.
Ai gjithashtu u bëri thirrje qytetarëve që t’u besojnë vetëm informacioneve zyrtare dhe të mos “përhapin thashetheme të pakonfirmuara” lidhur me motivet e sulmit apo identitetin e autorit.
Rusia e kontrollon gadishullin ukrainas të Krimesë që nga viti 2014. Shumica dërrmuese e komunitetit ndërkombëtar e refuzon aneksimin, duke e konsideruar atë si pushtim të territorit ukrainas.
Rusia mban një prani të madhe ushtarake në Krime, e cila është vënë në shënjestër nga Ukraina me sulme me dronë dhe raketa.
Sinjali – aty ku e vërteta flet para lajmit!
