Komediani dhe aktori Russell Brand është përballur me një situatë të sikletshme gjatë një paraqitjeje në emisionin e Piers Morgan, pasi moderatori e sfidoi të gjente dhe të lexonte një pjesë të caktuar nga Bibla.
Brand, i cili së fundmi ka bërë të ditur se është konvertuar në krishterim, nuk arriti ta gjente citimin e kërkuar, duke krijuar një moment të tensionuar gjatë bisedës për besimin e tij të ri.
Morgan i kërkoi Brandit të gjente dhe të lexonte një fragment të njohur nga Letra e parë drejtuar Korintasve. Brand filloi të shfletonte Biblën që e kishte me vete, por u pa qartë se kishte vështirësi për ta gjetur pjesën e saktë.
“Ende nuk jam… nuk jam ekspert për këtë”, pranoi ai. “Jam i ri në krishterim, jam i ri në krishterim”, përsëriti, ndërsa vazhdonte kërkimin pa sukses.
Pas disa çastesh, Morgan mori Biblën dhe lexoi vetë vargun e kërkuar: “Dashuria është e durueshme, dashuria është e mirë. Nuk ka zili, nuk mburret, nuk është krenare”.
Brand reagoi duke e cilësuar mesazhin si “të mrekullueshëm” dhe përsëriti se është ende në fillim të rrugëtimit të tij shpirtëror. “Jam vetëm në fillim të kësaj rruge”, u shpreh ai.
Brand, i cili muajin e kaluar u pagëzua në lumin Thames, tha se vendimi i tij për t’iu kthyer krishterimit nuk është akt shoqëror apo politik, por një kërkim për “shpëtim personal”. Ai e përshkroi këtë si përgjigje ndaj asaj që e quajti “falimentim moral dhe shpirtëror” të botës moderne.
Gjatë intervistës, ai theksoi disa herë se “nuk është teolog” dhe se rruga e tij e besimit sapo ka nisur, ndërsa episodi me citimin biblik u bë një moment që e ilustroi fillimin e këtij rrugëtimi.
Sinjali – aty ku e vërteta flet para lajmit!
